Kyivdeki prokurorlar Aqmescitte Qırımtatar Milliy Meclisiniñ reis muavinine qarşı cinaiy davada qarar çıqarğan qadığa qarşı devlet hainligi qabaatlavını mahkemege yolladı. O, 12 yıldan 15 yılğa qadar apis cezası ala bile.
Bu aqta Qırım Muhtar Cumhuriyeti Prokuraturasınıñ matbuat hızmeti sentâbrniñ 1-nde bildire.
Müessise malümatına köre, Qırım Muhtar Cumhuriyeti Aqmescitniñ Kiyev rayon mahkemesiniñ sabıq qadısı 2014 senesi yarımada işğalinden soñ Rusiye mahkeme organlarına çalışmağa keçti.
«Qadı Rusiyege Ukrainağa qarşı faaliyette yardım etip, işğalci memuriyetniñ tiklenmesi ve pekitilüvine yardım etti», – dep aytıla haberde.
Qırım Muhtar Cumhuriyetiniñ prokuraturası, «qabaatlanğan kişi Ukrainağa qol tutqanı ve yarımada işğaline qarşı tirengeni içün qanunsız cinaiy taqipke oğrağan Ukraina vatandaşı, Qırımtatar Milliy Meclisiniñ reberlerinden birine (Ahtem Çiygoz – QA) qarşı apiste tutuv müddetini uzatmağa qanunsız qarar alğan edi», dep bildire.
Al-azırda şübheli qıdırıla.
Müessise, qadınıñ qarar çıqarğan Meclis reberiniñ adını aydınlatmay. Amma Qırım Muhtar Cumhuriyeti Prokuraturasınıñ haberinde derc etilgen fotoresimge köre, laf Ahtem Çiygoz aqqında kete.
2020 senesi fevral ayında Qırım Muhtar Cumhuriyetiniñ Prokuraturası Qırımtatar Milliy Meclisiniñ reis muavini Ahtem Çiygoznı 2014 senesi fevralniñ 26-nda Qırım Yuqarı Şurasınıñ binası ögünde qalabalıqlarnı teşkil etkeninde qabaatlap taqip etken 25 şahısqa şübheli olğanını bildirdi.
2017 senesi sentâbrniñ 11-nde Rusiye mahkemesi yarımadanıñ Rusiye işğalinen bağlı narazılıqlarnı «qalabalıqlar» dep adlandırıp, Çiygoznı olarnı teşkil etkeninde qabaatladı ve sekiz yıl sert rejimli koloniyada qalmasına üküm etti. 2017 senesi oktâbrniñ 25-nde Rusiye akimiyeti Qırımda mahküm etilgen Ahtem Çiygoznı azat etip, onı Türkiyege teslim etti. Daa soñra o, Kyivge keldi.
2014 senesi fevralniñ 26-nda Qırım parlamentiniñ binası ögünde Ukraina topraq bütünliginiñ tarafdarları ve duşmanlarınıñ büyük mitingi olıp keçti. Qırımtatar ve Ukraina tarafdarı faallerine qarşı Rusiye tarafdarı faaller çıqtı.
2015 senesi yanvar ayında Rusiye Tahqiqat komitetiniñ Qırım idaresi fevralniñ 26-nda mitingde olğan qalabalıqlar aqqında cinaiy dava açtı.
Ukraina topraq bütünligine qoltutqanlar tutuldı: Qırımtatar Milliy Meclisiniñ reis muavini Ahtem Çiygoz, faaller Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev.
Daa soñra mahkeme «fevral 26 davasını» ekige böldi: o vaqıt Qırımda Meclis lideriniñ rolüni alğan baş şübheli Ahtem Çiygoz ayrı esnasqa alındı.
Advokat Cemil Temişevniñ teşebbüsinen faal Talât Yunusov ve ATR telekanalınıñ operatorı Eskender Nebiyev tahqiqatnen işbirligi yapıp, olarnıñ ifadeleri «fevral 26 davası» diger mabüsleriniñ davalarında delil olmaycaq şartınen qabaatlarını tanıdı. 2015 senesi dekabr ayında Talât Yunusov 3,5 yılğa, Eskender Nebiyev eki yılğa şartlı olaraq üküm etildi.
2017 senesi sentâbrniñ 11-nde Rusiye mahkemesi yarımadanıñ Rusiye işğalinen bağlı narazılıqlarnı «qalabalıqlar» dep adlandırıp, Çiygoznı olarnı teşkil etkeninde qabaatladı ve sekiz yıl sert rejimli koloniyada qalmasına üküm etti. 2017 senesi oktâbrniñ 25-nde Rusiye akimiyeti Qırımda mahküm etilgen Ahtem Çiygoznı azat etip, onı Türkiyege teslim etti. Daa soñra o, Kyivge keldi.
2018 senesi iyünniñ 19-nda Kreml kontrolindeki Aqmescitniñ Merkeziy rayon mahkemesi «fevral 26 davasınıñ» mabüslerine şartlı apis cezalarını berdi. Ali Asanov ve Mustafa Degermenci 4 yıl ve 6 ay, Arsen Yunusov ve Eskender Kantemirov 4 yıl, Eskender Emirvaliyev 3 yıl ve 6 ayğa şartlı olaraq üküm etildi, er birine 3 yıl sınav müddeti berildi.
2020 senesi fevralniñ 4-nde sınav müddeti bitmegen «fevral 26 davasınıñ» mabüsi Mustafa Degermencige qarşı cinaiy mahkümiyetniñ lâğu etilgeni belli oldı.
