Amerika Birleşken Devletleri Rusiyeniñ Qırım ilhaqını qanunsız dep saya ve tanımay, şu sebepten Washington Ukrainağa topraq bütünligini ğayrıdan tiklemek içün yardım etecek. Bu aqta ABD Ukraina meseleleri mahsus vekili Kurt Volker «Amerikanıñ sesi» ukrain hızmetine izaat berip ayttı.
Rusiye Qırımnı kontrol etken beş yıl içinde yarımadada vatandaş aqqı ve serbestligine riayet etüv vaziyeti qat-qat fenalaştı, dep qayd etti Volker. O, sebepsiz apis cezaları, sürgünlik ve siyasiy sebeplerden azatlıqtan marum etüv adiseleri aqqında hatırlattı.
AB, Kanada ve ABDniñ Rusiye memurlarına qarşı yañı sanktsiyalarnı kirsetmek qararını izaatlap, Rusiyege qarşı yañı sıñırlav tedbirleri olacaqmı sualine Volker müsbet cevap berdi.
«ABD, AB ve Kanadanıñ ortaq işi. Soñki beş yıl devamında körgen areketlerni ileride de körecekmiz, dep tüşünem. Vaziyet deñişmese, sanktsiyalar ara-sıra quvetleştirilecek. Birisi şimdiki vaziyetni qabul etilecegini sayamız ya da ondan memnünmiz dep tüşünmesini istemeymiz», – dep qayd etti ABD Ukraina meseleleri mahsus vekili.
Bundan evel Avstraliya 2018 senesi noyabrniñ 25-nde Qırım yalısında ukrain arbiy gemileri ve olarnıñ askerleri zapt etilgeninden sebep AB, ABD ve Kanadanıñ Rusiyege qarşı sanktsiyalarına qoşuldı.
Martnıñ 15-nde ABD Maliye nazirligi Rusiyeniñ Qara deñiz istilâsı sebebinden yañı sanktsiyalarnı kirsetti. 6 şahıs, 6 Rusiye mudafaa şirketi ve Qırımda çalışqan 2 şirket sanktsiyalarğa oğradı.
Bundan ğayrı, martnıñ 15-nde Kanada ukrain arbiy gemileri ve olarnıñ askerleri Qara deñizde zapt etilgeninden 114 insan ve 15 şirketke qarşı sanktsiya kirsetti. Avropa Birligi 2018 senesi noyabr ayında Keriç boğazı civarlarında ukrainalı askerlerniñ zapt etilüvi sebebinden Rusiye arbiylerine qarşı da sanktsiyalar kirsetti.
2018 senesi iyülniñ 25-nde ABD devlet kâtibi Mike Pompeo «Qırım deklaratsiyasını» aydınlattı. Oña binaen, Amerika Birleşken Devletleri Rusiyeniñ Qırım ilhaqını iç bir vaqıt tanımaycaq. Pompeonıñ bildirgenine köre, ABD Ukraina topraq bütünliginiñ ğayrıdan tiklenmesini ileride de talap etecek.
