Rusiyeniñ Kursk vilâyetinde avgustnıñ 7-nde fevqulâde vaziyet ilân etildi, dep bildirdi region valisiniñ vazifelerini eda etken Aleksey Smirnov.
«Kursk vilâyetinde sıñırdaki rayonlarda qıyın operativ vaziyet qala. Duşman qvuyetleriniñ regionğa kiriş aqibetlerini yoq etmek içün avgustnıñ 7-nden başlap Kursk vilâyetinde fevqulâde vaziyetni ilân etmege qarar berdim», – dep yazdı o, Telegramda.
Avgustnıñ 6-nda Rusiyeniñ yerli akimiyeti Rusiye Federatsiyası Kursk vilâyetindeki Sucanskiy ve Köreyevskiy rayonlarında sıñırnı yarıp keçüv ıntıluvı aqqında bildirdi. Rusiye Mudafaa nazirligi Ukrayına arbiylerini Rusiyeniñ Kursk vilâyetindeki Rusiye mevzisine qarşı ücümde qabaatladı.
Avgustnıñ 7-nde Rusiye Silâlı quvetleri Baş ştabınıñ yolbaşçısı Valeriy Gerasimov toplaşuvda Rusiye prezidenti Vladimir Putinge maruza berip, Ukrayına arbiylerini Kursk vilâyetinde ilerilemesi toqtatıldı, dep bildirdi. Onıñ aytqanına köre, şimdi Rusiye uquq qoruyıcıları «sıñırğa yaqın rayonlarda duşmannı» yoq ete.
Aynı vaqıtta Rusiye Telegram kanalları uruşlar sıñırdan tahminen 10 kilometr mesafede yerleşken Kursk rayonınıñ Suca şeerinde başlandı, dep yaza. Tasdıqlanmağan malümatqa köre, şeer Ukrayına Silâlı quvetleriniñ kontroli altında buluna ya da, başqa versiyağa köre, «operativ saruvda».
Vali vazifelerini eda etken Smirnov avgustnıñ 7-nde bildirgenine köre, Rusiyeniñ sıñır vilâyetlerinden 600 insan tahliye etildi.
Putin Rusiyeniñ Kursk vilâyetindeki vaziyetni izaatlap, Kyivni «büyük provokatsiyada» qabaatladı.
Ukrayina tarafı Rusiyeniñ aytqanlarını daa izaatlamadı.
Kursk vilâyetindeki adise-vaqialar aqqında haberlerden soñ cebede uruşlarnıñ sayısı bayağı eksildi. Ukrayına Silâlı quvetleriniñ Baş ştabı malümatına köre, avgustnıñ 7-nde saat 16:00-ğa qadar olarnıñ sayısı 54 edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
