«Ukrayina askerleri Rusiyeniñ Kursk vilâyetindeki bazı rayonlarda mudafaa tedbirlerini devam ettire. Quvetlerimiz duşmannıñ 1250 metr kâresimi ve 92 mesken yerini kontrol ete. Mevzilerimiz pekiştirile, bazı rayonlarnıñ stabilizatsiyası ve deñişüv fondunıñ tamamlanması yapıla», – dep ayttı Zelenskıy Ukrayinanıñ çetel diplomatik müessiseleriniñ reberleri toplaşuvında.
Onıñ aytqanına köre, bu operatsiya «ukrayinalılarnı Rusiye esirliginden azat etüv esnasına eñ büyük yatırım, maqsadlarımızdan biri» oldı.
Ukrayina Silâlı quvetleriniñ baş komandanı Oleksandr Sırskıy avgustnıñ 15-nde Ukrayina arbiyleri Rusiyeniñ Kursk vilâyetinde 82 mesken yerni kontrol altına aldı, dep bildirdi.
Avgustnıñ 6-nda Ukrayina Rusiyeniñ Kursk vilâyetine birden ücüm başlattı. Ukrayina Silâlı quvetleri onlarnen mesken yerni kontrol altına aldı, Suca rayon merkezi de kontrol etile. Rusiye akimiyeti bu malümatnı ya inkâr ete, ya da izaatlamay. Lâkin Kursk vilâyetinde federal seviyede fevqulâde vaziyet rejimi ilân etildi.
Ukrayina prezidenti Volodımır Zelenskıy avgustnıñ 18-nde Rusiyeniñ Kursk vilâyetinde Ukrayinanıñ tedbirleri «Rusiye ordusı ve Rusiye devletine, olarnıñ mudafaa sanayısı ve iqtisadiyatına zarar ketirmege devam ete», dep bildirdi.
Onıñ aytqanına köre, Ukrayinanıñ esas vazifesi – «Rusiyeniñ imkânlarını yoq etmek ve «bufer alanını» yapmaq maqsadınen mümkün olğanı qadar çoq qarşı darbe işini kerçekleştirmek».
Ukrayina Tış işler nazirligi avgustnıñ 13-nde Kyiv «Rusiyeniñ Kursk vilâyetindeki topraqlarnı almağa degil, ukrayinalılarnıñ ayatlarını qorçalamağa ve Rusiye darbelerinden qorumağa istey», dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
