The Washington Post neşiri Rusiyeniñ Kursk vilâyetinde Ukrayina ordusınıñ operatsiyası başlağanından yapılğan yüzden çoq video ve fotoresimlerni incelep, eñ az 247 Rusiye askeriniñ esir tüşkenini tasdıqladı.
Mında em Ukrayina arbiyleri, em The Washington Post fotoressamı cenk esirleri lagerinde çıqarğan videolar aqqında aytıla.
Neşir qayd etkenine köre, jurnalistler içtimaiy ağlarda peyda olmağa devam etken bütün video ve fotolarnı daa teşkermedi, şunıñ içün Ukrayina Silâlı quvetlerine tüşken Rusiye arbiyleriniñ sayısı daa çoq, dep tahmin etile.
Esirler ketirilgen Ukrayinanıñ şimaliy-şarqındaki apishane yolbaşçısınıñ aytqanına köre, eñ az 320 rusiyeli müessiseden keçti ve 80%-ı askerlik yapqanlar.
Ukrayina ve Rusiye Ukrayina Silâlı quvetleriniñ Kursk vilâyetindeki tedbirleri başlağanından ilk deñişüv kerçekleştirdi – «115-ke 115». Mudafaa nazirliginiñ resmiy beyanatına köre, Rusiyege öz toprağında zapt etilgen arbiyler qayttı. Ukrayina tarafı evge qaytqanlarnıñ çoqusı Mariupol ve «Azovstal» imayecileri ola, olar Rusiye istilâsınıñ ilk künlerinde esir tüşken edi.
«Vajnıye istorii» neşiri «Naş vıhod» areketi derc etken cedvelge (ne qadar doğru olğanı tasdıqlanmay) ve açıq malümatqa esaslanıp, Ukrayina Silâlı quvetleriniñ esirliginde eñ az 19 Rusiye askeri qala, dep bildirdi. Daa 66 kişi ğayıp olğan statusında buluna.
Ne Ukrayina, ne de Rusiye akimiyetleri Ukrayina Silâlı quvetleriniñ avgust tedbirleri vaqtında esir tüşken Rusiye askerleriniñ sayısını resmiy şekilde aydınlatmadı.
İyün ayında Rusiye prezidenti Vladimir Putin Ukrayinada 1348 rusiyeli esir buluna, Rusiyede ise 6465 ukrayinalı esir qala, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
