Türkiye, ABD ve AB tarafından terror teşkilâtı olaraq tanılğan Kürdistan İşçi Firqası silâsızlaştıruv çerçivesinde ordusınıñ Türkiye Cumhuriyetinden çekilgenini ilân etti, dep haber ete Reuters.
KİF haber etkenine köre, “serbest, demokratik ve qardaş ayatnıñ” temellerini qoymaq içün küçlerini çekmege qarar berdi. Firqanıñ beyanatında Ankara kürdlerniñ integratsiyasınen bağlı qanunlarnı qabul etmeli, dep aytıla.
Mayısta ömür boyu apis cezasını çekken lideri Abdullah Öcalan Türkiye devletine qarşı silâlı küreşni toqtatmağa ve silânı teslim etmege çağırğan soñ KİF dağılğanını ilân etti. Yazda Türkiye, Iraq ve Suriye kürdleri silâsını taşlap başladı.
Ükümran Adalet ve Kalkınma Firqasınıñ vekili KİF ordunı çekmek qararı Ankaranıñ maqsadına irişüvi oldı.
KİF Iraqnıñ şimalinde yerleşken edi, çünki soñki yılları onı Türkiyeniñ cenübiy-şarqiy sıñırından quvğanlar. Türkiye arbiyleri bu regionda kürd bazalarına muntazam sürette darbe endire ve anda bir qaç arbiy fortpost yaptı. Ankara kürdlerniñ aqlarını qoruy, amma separatizmge yol bermeycek, dep bildire.
1974 senesi Abdullah Öcalan 1978 Senesi Kürdistan İşçi Firqası olaraq resmiyleşken sol areketni teşkil etti. 1979 senesi Öcalan Suriyege köçti, anda Hafez Asadnıñ rejimi ve sovetlerniñ mahsus hızmetleri yardımınen silâlı otrâdlarnı şekillendirdi. 1984 senesinden başlap firqa marksizm-leninizm ğayelerine esaslanıp, Türkiyege qarşı silâlı küreş alıp bardı.
1999 senesi, Ankaranıñ Dimaşqqa qarşı basqısından soñ, Öcalan Suriyeni terk etti. O, Keniyada Amerika ve İsrail mahsus hızmetleri yardımınen hırsızlandı ve Türkiyege teslim etildi. Ölüm fermanını aldı, soñra ömür boyu apis cezasına deñiştirildi. O vaqıttan berli Marmara deñizindeki İmralı adasında tutula.
KİF başta mustaqil Kürdistan quruluvını istey edi, amma soñra talapları yımşadı ve Türkiyeniñ cenübiy-şarqında kürdlerniñ aqları kenişletilsin ve muhtariyeti olsun dep aytıldı.
Türkiye ve KİF arasında barışuv ıntıluvları çoq oldı. Soñki barışıq 2013 senesinden 2015 senesine qadar oldı ve KİF ile bağlı Suriye kürdleriniñ birleşmeleri Suriyeniñ şimaliy-şarqında kontrolni quvetleştirgen soñ bozuldı.
