Qırımlı advokat Emil Kurbedinovnıñ fikirince, Rusiye Adalet nazirliginiñ onı «Qırımnıñ merkeziy advokatlar kollegiyasından» çıqarmaq talabı oña ve diger zenaatdaşlarına yapqan işleri sebebinden basqı ola.
Bu aqta o, Qırım.Aqiqat mühbirine bildirdi.
«İkâyeniñ esas hulâsası şudır: ekstremizm ve terrorizm ile küreş qanunı – advokat, faal ve jurnalistlernen küreş aletidir. Menim vaziyetim – diger advokatlar içün telükeli bir emsal. Advokat statusından tek ihtisaslı komissiya marum ete bile, mında ise memuriy dava kibi alet ve Adalet nazirliginiñ talabı peyda ola. Bu usul anayasa qaidelerine zıt kele», – dedi advokat.
Kurbedinovnıñ aytqanına köre, bu vaziyette yalıñız onıñ işi sual altında qalmay, advokat kollegiyadan çıqarılmasa, kollegiyanı yoq etmeleri mümkün.
«Reis şimdi toqmaq ve sandal arasında: ya maña qarşı bir tedbir alacaq, ya da kollegiyanı qapatırlar», – dep bildirdi Kurbedinov.
Qırımlı advokat Emil Kurbedinovnı Rusiye uquq qoruyıcıları 2018 senesi dekabrniñ 6-nda tutıp aldı. Mahkeme onı 2013 senesi Facebookta paylaşqanları içün ekstremist teşkilâtlarnıñ işaretleri ya da timsalleriniñ teşviqatı ve açıq numayış etilmesi sebebinden 5 künge apiske aldı. Kurbedinovnıñ zenaatdaşları dey ki, onı Suriye paytahtı Dimaşqqa köçken Qırım sakini şikâyet etti.
Advokatnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
