«Yandeks» qıdıruv sistemasınıñ malümatı rusiyelilerniñ Qırımnen artıq meraqlanmağanını köstere, dep bildirdi Ukrayına Tış işler naziri Dmıtro Kuleba.
Onıñ aytqanına köre, Rusiye vatandaşları hırsızlanğan Ukrayına toprağında keyf çatmaq vaqtı soñuna kelgenini añlay.
«2022 senesi mart ayına baqqanda (261 000) «Qırımda raatlıq» qıdıruvları 2023 senesi mart ayında eki qat az (129 000) edi. Adiy rusiyeliler bile hırsızlanğan Ukrayına toprağında keyflenüv vaqtı yekünlengenini añlay», – dep yazdı müessise yolbaşçısı Twitterde.
Böylece, Kuleba Ukrayına ordusınıñ qarşı ücümini ima etti.
Avropada ABD ordusınıñ sabıq komandanı Ben Hoces Ukrayınanıñ qarşı ücümi işğal etilgen Qırımnı azat etmek içün yapılacaq, dep bildirdi.
Onıñ fikirince, yarımadanıñ işğalden qurtarıluvı Ukrayına ordusı içün esas vazife ola, çünki Qırım «al etecek topraq» ola. Arbiyniñ tahminlerine köre, Kyiv başta yarımadağa, soñra Donbasqa keçecek. «Qırım azat etilse – er şey deñişecek», – dep bildirdi Hoces.
Uydu resimleri Qırımnıñ şimalinde «Ermeni Bazar» ve Perekop Rusiye keçiş noqtaları rayonında çift oko yolağı bar, dep köstere. Uydu fotoresimleri E-105 yolunıñ eki tarafında da ve Sivaş gölü yanında yañı fortifikatsion inşaatlarnı kösterdi.
Fevralniñ 24-nde Ukrayına prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirdi.
Soravlar köstergenine köre, ukrayınalılarnıñ 60%-dan ziyadesi işğal etilgen Qırımnıñ cenk yolunen azat etilüvine qoltuta – Rusiye ile cenk daa uzun olsa ve Ğarpnıñ yardımı eksilse bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net/?utm_medium=otf&utm_campaign=proxy&utm_source=otf. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
