Ukrayina Tış işler naziiri Dmıtro Kuleba Ukrayinanıñ bütün tarafdarlarını Donetsk vilâyetiniñ işğal etilgen Olenivkadaki cezahaneniñ rus ordusı tarafından ateşke tutulmasını takbih etmege ve Rusiyeni terrorcı devlet kibi tanımağa çağırdı.
"Rusiyeliler işğal aetilgen Olenikadaki ukrayinalı arbiy esirleriniñ tutulğan tüzetüv müessiseni ateşke tutıp daa bir deşetli cinayet yaptılar. Bütün ortaqlarnı halqara gumanitar uquqnıñ bu qaba şekilde bozulmasını qatiyen takbih etmege ve Rusiyeni terrorcı devlet kibi tanımağa çağıram", - dep yazdı o Twitterde.
Rusiye qoltutqan «DNR» gruppirovkasınıñ aydutları Olenivkadaki koloniyağa açılğan ateş neticesinde eñ az 53 ukrayınalı cenk esiri elâk oldı, dep bildire. Başta 40 kişi elâk oldı, dep aytıldı. Aydutlar Ukrayına silâlı quvetlerini qabaatlamağa tırışa. Ücüm aqqında Rusiye Federatsiyasınıñ Mudafaa nazirligi de bildirdi.
Olenivkadaki koloniyada ukrayınalı cenk esirleri, hususan bu yıl mayısta Mariupolde esir alınğan ukrayınalı arbiyler tutula.
Eki taraf da mustaqil malümat bermey. «İnsan aqları media teşebbüsiniñ» koordinatorı Olga Reşetilova qayd etkenine köre, «rusiyeliler cenk esirleri ve reineler mevzusını oyunlarda qullanıp başladı».
Prezident ofisiniñ yolbaşçı mesleatçısı Mıhaylo Podolâk bildirgenine köre, ukrayınalı esirlerge işkence yapqanından şübheli sayılğan Rusiye arbiyleriniñ kim olğanı teşkerilecek ve olar cezasını çekecekler.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
