Türkiyeniñ Antalya şeerinde martnıñ 10-nda Ukraina ve Rusiye Tış işler nazirleri Dmıtro Kuleba ve Sergey Lavrovnıñ Türkiye Tış işler naziri Mevlüt Çavuşoğlunıñ iştiraki ile körüşüvi ötkerilmeli.
Tünevin aqşam Ukraina Tış işler nazirliginiñ spikeri Kuleba Antalyağa kelip çıqtı, dep bildirdi.
Ukraina naziri Lavrov Türkiyege kelse, onen muzakerelerge azır, amma printsipial meselelerde deñişme olmaycaq, dep bildirdi.
«Biz muzakere keçiremiz, amma Ukraina diplomatiyası devletimiz içün iç bir printsipial meselede razı olmaycaq», – dedi o.
Ankara martnıñ 7-nde Ukraina, Rusiye ve Türkiye tış işler nazirleriniñ Antalyada üç taraflı körüşüvini ilân etti. Bu fevralniñ 24-nden Rusiye Ukrainağa ücüm etkeninden berli yüksek seviyeli diplomatlar arasında ilk muzakere olacaq.
NATO azası olğan Türkiyeniñ em Kyivnen, em Rusiyenen sıqı munasebetleri bar, Türkiye Putin fevralniñ 24-nde Ukrainağa ücüm etkenini ilân etken soñ, cenk areketlerini toqtatmağa çağıra.
Ukraina prezidenti ofisiniñ yolbaşçı muavini Mıhaylo Podolâk Kyiv «mesüliyetli bir halqara aracı» istey, çünki Ukraina tarafı «Rusiye Federatsiyasına iç işanmay», dep bildirdi.
Ukraina prezidenti Volodımır Zelenskıy martnıñ 3-nde Türkiye prezidenti Recep Tayyip Erdoğan Rusiye prezidenti Vladimir Putinni Ukrainadaki cenkni toqtatmağa iqna ete bilecek pek az dünya liderlerinden biri ola, dep bildirdi.
Fevralniñ 27-nde Türkiye Rusiye arbiy gemileriniñ Aq deñizden Qara deñizge keçmesini sıñırlaycaq Möntre Şartnamesini yerine ketirmek qararı aqqında bildirdi. O künü ilk sefer NATO azası olğan Türkiye reberliginiñ vekili Ukrainadaki vaziyetni cenk dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
