Türkiye prezidenti Recep Tayyip Erdoğan bu afta Ukrainağa kelecek, dep bildirdi Tış işler naziri Dmıtro Kuleba yanvarniñ 31-nde brifingde.
Nazir bunı «Ukraina ziyaretleriniñ paradı» dep adlandırdı. O, keçken sene halqara ortaqlarnı yanvar ve fevral aylarına davet etken edi, dep qayd etti – «ilk evelâ Ukrainada daima çetel top memurları olsun dep».
Onıñ aytqanına köre, bu künleri Kyivde aynı vaqıtta Büyük Britaniya, Poloniya ve Felemenk baş nazirleri olacaq. Yunanistan Tış işler naziri endi Ukrainada buluna, Felemenk ve Büyük Britaniya Tış işler nazirleri aman-aman yoldalar.
Kelecek afta bir qaç merkeziy Avropa memleketiniñ ve «normand formatında» aracı memleketler olğan Almaniya ve Frenkistan diplomatik müessiseleriniñ yolbaşçıları ziyaret etilecek.
«Bundan ğayrı, bu afta Ukrainada Türkiye prezidentini qarşılaycaqmız, şunıñ içün Ukraina prezidenti, baş naziri ve menim halqara kün tertibim tolu olğanını köresiñiz. Rusiyeni tutmaq içün epimiz ortaqlarımıznen çalışamız. Vladimir Putinniñ aqlında ne olğanını kimse bilmey, amma çetel top memurları Ukrainada olsa, arbiy kerginleşüv telükeleri daa az olğanını bilem», – dep ayttı Kuleba.
Prezident Volodımır Zelenskıynıñ vekili Serğiy Nikiforov Erdoğannıñ Ukraina-Türkiye Strategik şurası çerçivesinde planlaştırılğan ziyaret çerçivesinde Ukrainağa kelecek, dep Azatlıq Radiosına bildirgen edi. Faqat tam künü daa belli degil. Türkiye prezidenti de ziyaretini ilân etken edi.
