Ukrayina TİN başı Dmıtro Kuleba Amerika Birleşken Devletleriniñ Devlet kâtibi Entoni Bltnken ile aytışuvlardan soñ Ukrayinağa ABD-den daa çoq ağır silâlar berilmesi aqqında bildirdi.
"ABD Devlet kâtibi Entoni Blinken ile laf ettim. Men onıñ ABD-niñ ve global mıqyasta Ukrayinağa devamlı destegini temin etmek içün şahsiy ğayretini yüksek qıymetledirem. Ağır silâlar kün tertibimizniñ başındadır ve daa çoq yolda. Ukrayina ve ABD Rusiyeniñ blokadasına baqmadan bizim azıq ihracatımıznı alıp barmaq içün yan-yanaşa çalışalar", - dep yazdı Kuleba Twitterde.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
