Ukraina TİN başı Dmıtro Kuleba Avropa Birligi Tış işler nazirleriniñ onlayn körüşüvi vaqtında iştirakçilerge, yañı sektor sanktsiyalar dahi olmaqnen Rusiyeni ilerideki kerginleşmeden tutmaq içün adım-adım areketler planını teklif etti.
«Rusiye Federatsiyasınıñ Ukrainağa qarşı tecavuzına köre qıymetini arttırmaq içün 2014 senesinden berli yapılğan bütün adımlar içün Avropa Birligine minnetdarmız. Aynı zamanda, bugündeki vaziyette şahsiy sanktsiyalar endi yeterli degil. Rusiye Federatsiya tarafından yañı bir tecavuz olğan taqdirde deral qoyula bilecek yañı bir sektor sanktsiyalar paketiniñ azırlanılması içün Avropa Birligi ile içki bir munaqaşanı şimdi endi keçirmek kerek», – TİN matbuat hızmeti Kulebanıñ aytqanlarından alıntı ketire.
AB ve aza devletler Ukraina topraq bütünligine ve suverenitetine destek bildirdiler ve ileride de Rusiyege tazyıq yapmağa azır olğanlarına inandırdılar.
«Rusiye Federatsiyasınıñ Qara-Azaq akvatoriyasındaki qanunsız areketleri, işğal etilgen Qırımnıñ, Qara ve Azaq deñizleriniñ arbiyleştirilüvi ayrı bir mevzu oldı. Dmıtro Kuleba AB-den zenaatdaşlarınen RF tarafından Keriç boğazınıñ qapatıluvı ve Azaq deñiziniñ blok etilüvi köntekstinde halqara deñiz uquqınıñ bozulmasına cevap berme yollarını mazakere etti», – dep yazıla bildirmede.
Bundan ğayrı Dmıtro Kuleba Avropa Birligi aza devletlerine «Qırım platforması»na davetni bir daa tasdıqladı.
Avropa Birligi Tışqı siyaset hızmetiniñ başı Josep Borrell Rusiyeni Ukraina ile sıñırdan ordusını keri çekmegeçağırdı.
Austriannıñ malümatına köre, halqara seviyede tanılğan Ukraina sıñırı boyunca 2015 senesinden berli «Rusiye on biñlernen askerini yerleştirip, ordusınıñ sayısı arttıra, bölüklerni faalleştirdi, bazalarını yañarttı ve daa küçlü bir yer, ava ve ava mudafaasını yerleştirdi».
Soñki vaqıtları Rusiye Donbasnıñ işğal etilgen qısmında gibrid küçleriniñ cenk areketlerini arttıra. Böylece, ateşkes rejiminiñ şartları bozula, amma Rusiye Ukraina ordusını qabaatlamağa tırışa. Bundan ğayrı, Qırımda ve Ukraina sıñırı yaqınlarında Rusiye askerleriniñ sayısını arttıruv Kyiv ve ğarbiy ortaqlarınıñ qasevetini doğura, çünki Rusiye ordusınıñ Ukrainağa açıq ücüm imkânı bar.
Ukrainanıñ ğarbiy ortaqları (ABD ve AB) ve NATO oña qol tutqanını bildirdi.
Kreml, Rusiye ordusınıñ Rusiyede areket etmesi diger memleketlerni, hususan Ukrainanı qasevetlendirmemeli.
Mart ayında Ukraina silâlı quvetleriniñ baş komandanı Ruslan Homçak bildirdi ki, Rusiye, «Zapad-2021» strategik talimlerine azırlıq manaçığınen Ukrainanıñ şarqiy sıñırlarına taktik gruppalarını çeke. Onıñ qayd etkenine köre, Novorossiysk ve Stavropolden işğal etilgen Qırımğa talimler içün avuştırılğan Rusiye ordusı yarımadada qalmağa devam ete.
Kreml, Rusiye ordusınıñ Rusiyede areket etmesi diger memleketlerni, hususan Ukrainanı qasevetlendirmemeli, dedi.
Qırımnıñ askeriyleştirilüvi
2014 senesi Qırım işğal etilgen soñ Rusiye yarımadada ve Qara deñizde muntazam sürette arbiy talimler keçire, arbiy tehnikanı, hususan uçaqquvar mudafaa sistemasını ketirip qoya.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda ise Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
Ukraina Baş ştabı, Rusiye arbiyleriniñ Qırımda yapqanlarını qanunsız dep adlandıra.
Ukrainanıñ BM daimiy vekiliniñ muavini Yuriy Vitrenko, Rusiye yarımadada nükleer silâsını yerleştirgeninden qorqqanını bildirdi. Ukraina Milliy telükesizlik ve mudafaa şurasınıñ kâtip muavini Serğiy Krıvonis, Qırımda nükleer silâsı olması mümkün bir qaç yer bar, dep bildirdi. Onıñ fikirince, onıñ yarımadada yerleştirilüv ihtimali «ğayet büyüktir».
2020 senesi dekabr ayında Kreml temsilcisi Dmitriy Peskov Rusiyeniñ Qırımda «telükesizligi içün er şey yapmağa aqqı bar», dep bildirgen edi.
BM Baş Assambleyası 2019 senesi dekabr ayında Rusiyeni işğal etilgen Qırımdan ordusını çıqarmasına ve Ukraina topraqlarınıñ vaqtınca işğalini toqtatmasına çağırğan qararnı qabul etti.
