Rusiye kontrolindeki Qırım Yuqarı mahkemesi Aqmescitteki Rusiye Jeleznodorojnıy rayon mahkemesiniñ «Qırım birdemliginiñ» mühbiri Kulamet İbraimovnı memuriy apiske almaq qararını deñiştirmedi, dep bildirdi advokat Lilâ Gemeci.
O, apis müddeti bitkenine qadar mahsus bölükte tutulacaq. İbraimov 5 künge apiske alındı.
İmaye mahkeme oturışuvında İbraimovnıñ areketlerinde memuriy uquq bozuvları yoq edi, o, muarririyetniñ vazifesinen mahkemede edi, dep israr etti. İlk mahkemede polis hadimleri tarafından şaat olaraq celp etilgenler cemaat nizamını kimse, şu cümleden İbraimov, bozmadı ve yayalarnıñ areketine keder etmedi. Gemeci bildirgenine köre, bunı mahkemede baqılğan video da isbatlay.
«Videoda yahşı körüne, er kes avtobusqa keçsin dep ilân etilgende Kulamet Yuqarı mahkeme binasında cemaat nizamını temin etken vekilnen subetleşe. Bu Yuqarı mahkemede, qora arqasında ola. Vekil bir şey aytmay, İbraimov bir şey bozmay, aks alda vekil oña qarşı protokol tizmek kerek edi. Videoda körüngeni kibi, İbraimov aylanıp, vekilnen beraber mahkeme binasına keçe. Amma oturışuv qapalı olacaq ve jurnalistler kirsetilmeycek, dep belli olğan soñ o, azbarğa çıqa ve polis hadimleri tarafından tutula», – dep ayta imayeci.
İyülniñ 27-nde mahkeme binası ögünde şikâyet arizası baqılğan Nariman Celâl ve ağa-qardaş Asan ve Aziz Ahtemovlarnıñ tarafdarları toplaştı. Davalarında şikâyet arizası baqılacaq. Aq qorçalayıcılarnıñ malümatına köre, saat 10:30-da 13 insan tutuldı – 10 erkek ve üç qadın.
Berilgen malümatqa köre, Rusiye kontrolindeki Qırım Yuqarı mahkemesiniñ binası ögünde tutulğanlar arasında qırımlı aq qorçalayıcı Lutfiye Zudiyeva, siyasiy mabüs Aziz Ahtemovnıñ anası Zarema Ahtemova, «Qırım birdemliginiñ» mühbiri Kulamet İbraimov ve siyasiy mabüs Nariman Celâlnıñ qardaşı Ruslan Celâlov bar. Dört kişige para cezası berildi, İbraimov ise apiske alındı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
