Büyük Onlar qasabasında vatandaş jurnalisti Kulamet İbraimovnıñ evinde tintüv keçirildi, dep haber ete «Qırım birdemligi».
Tünevin İbraimov beş künlik memuriy apis cezasından soñ azatlıqqa çıqtı. Jurnalist anasınıñ evinde qayd etilgen: amma evlengen soñ ayrı yaşay. Tintüv vaqtında başqa yerde edi.
Jurnalistniñ qayd etkenine köre, saba erte ana-babasınıñ evine 10 kişi sürip kirdi. Episi maskalı, silâlı edi, bir işaretleri yoq edi. Tintüv qararını oqudılar, amma neticede qorantağa bir kâğıt qaldırılmadı.
Jurnalistniñ doğmuş qardaşları ve anası Nefize İbraimovanıñ cep telefonları alındı. «Anam pek qorqtı, özüne kelip olamay», – dep qayd etti İbraimov.
Tintüv tahminen bir saat devam etti, amma uquq qoruyıcılar bütün evni baqıp çıqtı.
«Araba, aran ve ev bütünley baqıldı – bütün vesiqalar alındı. «101 dua» kitapçığını tapıp, ne olğanını soradılar, çoq baqtılar. Menim yerimi soradılar. Tuvğanlarım kirada oturam, mında yaşamayım, dep ayttı. Olar faaliyetimni devam ettirsem, soñu yaramay olacaq, şunıñ içün «meni tınçlandırmaq kerek», dep aytqanlar», – dep qoştı mühbir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
