Vatandaş jurnalisti Kulamet İbraimov Aqmescitte beş künlik memuriy apis cezasından soñ azatlıqqa çıqtı, dep haber ete «Qırım birdemligi».
«Epimiz Qırımda jurnalistlerniñ faaliyetine kene basqı yapmağa tırışılğanını añlaymız. Bizni 5, 10, 15 künge qapatıp, bizni 2014 senesinden berli olğan kerçeklikke nisbeten daa mert yapalar. Bu yolda men toqtamaycam, çalışmağa devam etecem», — dep izaatladı azat etilgen soñ İbraimov.
İyülniñ 27-nde mahkeme binası ögünde şikâyet arizası baqılğan Nariman Celâl ve ağa-qardaş Asan ve Aziz Ahtemovlarnıñ tarafdarları tutuldı. Qırımlı aq qorçalayıcı Lutfiye Zudiyeva, siyasiy mabüs Aziz Ahtemovnıñ anası Zarema Ahtemova, «Qırım birdemliginiñ» mühbiri Kulamet İbraimov ve siyasiy mabüs Nariman Celâlnıñ qardaşı Ruslan Celâlov edi. Olarnıñ arasında — jurnalistler Kulamet İbraimov ve Lutfiye Zudiyeva. Tutulğan 14 insandan beşine qarşı memuriy protokol tizildi. İbraimov — memuriy apis cezası berilgen yekâne insan. Qalğanlarına 12 biñden 15 biñ rublege qadar para cezası berildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
