Armannıñ 26-na keçer gecesi işğal etilgen Qırımnıñ bir qaç rayonında patlav sesleri eşitildi, Aqyarda ise ava telükesi ilân etildi.
"Krımskiy veter" telegram kanalı, abunecilerine atıf eterek, küçlü patlavlar Aqyarda, Saq rayonında ve Kezlev yanındaki Zoazernoye rayonında eşitildi, dep yaza. Qırım.Aqiqat mühbirleri de Aqyar ve Kezlevdeki patlavlar aqqında haber etti .
Bundan ğayrı, Bağçasaray rayonı ve Aqmescit sakinleri elektrik teminlevinde aqsavlardan şikâyet ete: bir saat devamında yarıqnı de söndüreler de bere ekenler.
Aqyarnıñ Rusiye yolbaşçısı Mihail Razvojayev şeerde saat 00:19 ava telükesi ilân etilgenini bildirdi. 19 daqqa soñra onıñ lâğu etilmesini bildirdi.
Rusiye Mudafaa nazirligi saba esabatında bildirdi ki, Armannıñ 25-i saat 20:00-den Armannıñ 26-sı saat 07:00-ge qadar işğal etilgen Qırım ve daa 15 Rusiye regionı üzerinde ava mudafaasınıñ nevbetçi vastaları tarafından 426 Ukrayin pilotsız uçağaı toqtatıldı ve yoq etildi.
Qırım.Aqiqat cenk şaraitinde bu malümatnı mustaqil sürette teşkerip, tasdıqlayalamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.