Bütündünya Qırımtatar kongressi kelecek sene Ankarada öz üçünci Baş toplaşuvını keçirecek, dep haber ete teşkilâtnıñ resmiy saytı.
Toplaşuv 12 yıllıq aralıqtan soñ olacaq. Birinci Baş Assambleya 2009 senesi Aqmescitte, ekincisi ise 2015 senesi Ankarada olıp keçtiler. Şimdi ise, qurultay Türkiye paytahtına qayta.
2009 senesi Quralaynıñ 19-22 künleri keçirilgen birinci Baş Qurultayda 12 memleketten 162 Qırımtatar teşkilâtı temsil etildi. Ekincisi 2015 senesi Oraqnıñ 31-den Armannıñ 2-ne qadar olıp keçkeninde 14 memleketten 184 teşkilât iştirak etti. Soñra halqara cemaat teşkilâtı olaraq VKKT-niñ Nizamnamesi bir ağızdan tasdıqlandı. Qurultay Kıyivde 2017 senesi resmiy cedvelge alındı.
Üçünci Qurultaynı başta Kıyivde keçirmek planlaştırılğan edi. Lâkin COVID-19 pandemiyası, soñra ise 2022 senesi Kiçikniñ 24-nde Rusiyeniñ Ukrayinağa keñ kölemli basuvı sebebinden onı keçiktirmege mecbur oldılar.
Toplaşuvda tek Qurultay Nizamnamesini ve evelki Baş Toplaşuvlarnıñ qararlarını resmiy sürette tanığan Qırımtatar cemaat teşkilâtları ve teşebbüsleri iştirak ete bilecekleri bildirile.