İşğal etilgen Qırımnıñ Rusiye Yuqarı mahkemesi Rusiye uquq qoruyıcıları terrorizmde qabaatlağan Fevziye Osmanova, Elviza Aliyeva, Esma Nimetulayeva ve Nasebe Saidovanıñ sıñırlav tedbirini deñiştirmedi. Dava boyunca istinaf şikâyeti red etildi. Bu aqta "Qırım birdemligi" advokat Emil Kyrbedinovnıñ malümatına esaslanıp haber ete.
"Mahkeme oturışuvı vaqtında birinci mahkeme – Kiyev rayon mahkemesi – yapqan bozuvlar seslendirildi, hususan taraflarnıñ yarışı kibi esas printsiplerini. Qayd etildi ki, sıñırlav tedbiriniñ devamı tek ağır cinayetlerde qabaatlanğanlarına esaslana. Aynı vaqıtta bütün deliller qabaatlanğanlar tarafından tasdıqlandı. Müvekkillerimiz imaye delillerine qoltuttı, amma mahkeme, beklengeni kibi, bugün seslendirilgen qararnı aldı. Kiyev rayon mahkemesiniñ qararı deñişmey, istinaf şikâyetimiz ise qanaatlendirilmey", – dedi Emil Kurbedinov.
Hatırlatamız, dört qırımtatar qadını 2025 senesi oktâbrniñ 15-nde tutuldı. Bir künden soñ Aqmescitniñ Kiyev rayon mahkemesi qadınlarnı "Hizb ut-Tahrir" islâm siyasiy firqasınıñ faaliyeti ile alâqaları bar olğanında qabaatlap, eki ayğa SİZOğa yolladı. Nimetullayeva terror teşkilâtınıñ faaliyetini teşkil etkeninde (Rusiye Federatsiyası Ceza kodeksiniñ 205.5 maddesiniñ 1-inci qısmı) qabaatlandı. Qalğanları – bu maddeniñ 2-nci qısmına istinaden (faaliyette iştirak etüv).
2025 senesi oktâbr soñu-noyabr başında apiske alınğanlarnıñ ana-babaları da olğan 16 kişilik eyyet Moskvağa barıp, Rusiye ombudsmeni Tatyana Moskalkova, Baş prokuror ve prezident memuriyetiniñ ofisini ziyaret etti. İnsanlar yarımada sakinleriniñ imzalarınen muracaat ketirdi.