Ukrayinada yañı edebiyat yarışı ilân etildi – "Qırım ailesi" qırımtatar medeniy-tasil merkezi Ukrayina Mudafaa nazirliginiñ Baş istihbarat idaresiniñ elâk olğan arbiyi Seyran Kadırov adına bala yarışını keçirecek.
Merkez fevralniñ 21-nde qayd etilgen Ana tili kününe bağışlanğan bala şiir ve nesir eserleri yarışını ilân etken edi.
"Seyran Kadırov teşkilâtımıznıñ dostu edi, üç güzel qıznıñ babası, ekisi merkezimizdeki derslerge büyük sevginen qatnay edi. O, Vatanınıñ samimiy vatanperveri edi, büyük yürek insanı, faaliyetimizge daima qoltuta edi. Büyük cenk başlağanınen Seyran Kadırov Ukrayina Mudafaa quvetlerine qoşuldı, devletimiz ve azatlığımıznı cesürliknen qorudı. 2023 senesi yanvar ayında canını Ukrayinağa feda etip elâk oldı", – dep qayd ete teşkilâtçılar.
Yarış mevzusı: Vatan, Qırım, tuvğan til sevgisi, "Til – halqnıñ yüregidir, söz ise – hatırasıdır".
Yarışta 18 yaşını toldurmağan er kes iştirak ete bile. Şiir ya da nesir qırımtatar tilinde yazılmalı. Şiir ya da eserlerniñ parçaları seslendirilse, daa yahşı olur (ses ya da video ola bile).
İşlerni "Yarışqa" qaydınen krimskarodina@ukr.net elektron adresine yollamaq kerek. İşler fevralniñ 20-ne qadar qabul etilecek, ğalipler ise fevralniñ 21-nde ilân etilecek. Ğalipler mukâfat ve hatıra ediyelerini alalar.