Rusiyeniñ Krıvıy Riğ şeeriye qarşı raketa ücümi neticesinde dört kişi elâk oldı, 43 insan yaralandı. Bu malümatnı saat 12:30-ta qurtarıcılar bere.
«Devlet fevqulâde vaziyetler hızmetiniñ bölükleri üç insannı qurtardı, şu cümleden 2013 senesi doğğan balanı, 30 insan tahliye etildi. Umumen qıdıruv-qurtaruv işlerine 230 insan ve 57 dane tehnika celp etildi, olardan Devlet fevqulâde vaziyetler hızmetinden 85 qurtarıcı ve 22 dane tehnika. İş devam ete», – dep aytıla haberde.
Dnipropetrovsk vilâyetiniñ arbiy memuriyet yolbaşçısı Serğiy Lısak elâk olğanlar arasında 10 yaşında bala bar, dep qayd etti.
Krıvıy Riğ Mudafaa şurasınıñ reisi Oleksandr Vilkun daa sekiz kişi yıqılğan bina altında qala bile, dep ayttı.
«Eki operativ ştab teşkil etildi... Anda insanlar kerekli yardım ala bile – aş, suv, yerleşüv, tibbiy yardım, maddiy yardım müracaatı», – dep qayd etti Vilkul.
İyülniñ 31-nde saba Rusiye ordusı Krıvıy Riğ şeerine eki raketa attı – bir danesi mesken evniñ dördünci qatından doquzıncı qatına qadar sektsiyağa, ekincisi kimse yaşamağan binağa tüşti.
Rusiye arbiyleri Ukrayına şeerlerine ateş ete. Delillerge baqmadan, Rusiye Ukrayınada vatandaşlarğa ve arbiylerge qarşı cinayetlerde mesüliyetini inkâr ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
