Yaltadaki «Hizb ut-Tahrir işiniñ» iştirakçisi Arsen Cepparov tutulğan Rostov-na-Donudaki SİZO hadimleri oña tibbiy yardım köstermedi, çünki «bir şikâyeti olmağan eken». Bunı SİZO memuriyetinden cevap alğan advokat Ayder Azamatov bildirdi.
Advokatnıñ aytqanına köre, Rusiye Baş prokuraturası, onıñ şikâyetini Cepparov tutulğan SİZOğa ve Rostov vilâyetiniñ prokuraturasına yollağanını haber etti.
«Taqiqat izolâtorınıñ memuriyeti cevap bergenine köre, Cepparov oña tibbiy yardım kösterilmesini yazma şekilde istemedi, böyle bir arizası berilse, reberlik onı baqmağa azır», – dep ayttı imayeci.
Azamatovnıñ qayd etkenine köre, «insan yaramasa, öleyatsa – tibbiy yardım köstermek içün bir de bir arizağa acet yoq».
«Em de yazacaq alı endi qalmasa», – dep qoştı Azamatov.
Bundan evel advokat Facebookta Arsen Cepparovnıñ «kritik alı» aqqında bildirgen edi.
Advokat Rusiye devlet organlarına bunıñnen bağlı bir sıra şikâyet yolladı.
Mayısnıñ soñunda Şimaliy-Kavkaz okrugınıñ arbiy mahkemesi Yaltadaki «Hizb ut-Tahrir işiniñ» altı iştirakçisine tevqif müddetlerini uzattı.
Bu iş boyunca qabaatlanğan Arsen Cepparov, Refat Alimov, Emir-Usein Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada tutuldı. Olar Rusiyede yasaq etilgen «Hizb ut-Tahrir» siyasiy İslâm teşkilâtına alâqadar olğanında qabaatlana.
Rusiye arbiy mahkemesi Yaltadaki «Hizb ut-Tahrir işini» Aqmescitte ötkerilgen köçüci oturışuvlarında baqa edi. Ondan soñ tevqif etilgen Qırım sakinleri Rostov-na-Donu şeerine yollanıldı.
Ukraina Tış işleri nazirligi Rusiyeden Yaltadaki «Hizb ut-Tahrir işi» figurantlarınıñ azat etilmesini talap ete.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
