2022 senesi fevral ayından başlap siyasiy sebepli taqiplerniñ eñ az 55 qurbanı Qırımdan Rusiyedeki apishane ve koloniyalarğa avuştırıldı, dep bildirdi «KrımSOS» aq qorçalayıcı teşkilâtınıñ talilcisi Yevğen Yaroşenko.
Onıñ aytqanına köre, bazı qırımlılar uzaq yerlerge (meselâ, Çelâbinsk vilâyeti ya da Krasnoyarsk ülkesine) avuştırıla, soy-sopları ve advokatları olarnı qolay-qolay ziyaret etip olamay.
Yanvarniñ 18-nde «qırımlı musulmanlar davasının» mabüsi Arsen Abhairov etap etildi. Yeniseysk apishanesinden (Rusiyeniñ Krasnoyarsk ülkesi) qırımtatarı Burâtiyadaki sert rejimli koloniyağa avuştırıldı.
Yaroşenko aytqanına köre, işğal etilgen Qırımda Abhairov ve 106 diger Ukrayına vatandaşı Ukrayına qanunlarına köre cinayet sayılmağan areketlerde qabaatlanıp qanunsız bir şekilde taqip etildi.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
