«KrımSOS» aq qorçalayıcı teşkilâtı Rusiyede «istenilmegen» olaraq tanıldı, dep bildirdi Rusiye Baş prokuraturası.
Rusiye müessisesi «KrımSOS» faaliyeti «Rusiye Federatsiyasınıñ anayasa qurumı ve telükesizligi içün havflı ola», dep bildirdi. Anda aq qorçalayıcı teşkilât «Rusiye Silâlı quvetlerini itibardan tüşürüv informatsion kampaniyasında faal iştirak ete», dep tüşüneler.
«KrımSOS» yarımada işğaliniñ ilk künleri – 2014 senesi fevralniñ 27-nde göñülliler tarafından Facebookta «Qırımdaki vaziyetnen bağlı tez ve teşkerilgen malümat» bermek maqsadınen bir saife olaraq açıldı. Al-azırda maqsadı «Qırımnıñ işğalden qurtarıluvı ve yarımadanıñ reintegratsiyası» olğan cemaat ve aq qorçalayıcı teşkilâtı ola.
«KrımSOS» faaliyeti Qırım işğali ve Rusiyeniñ qırımlılarğa qarşı repressiv siyasetiniñ qanunsızlığını aydınlatmaq, yarımadanıñ esas Ukrayına ile bağlarına qoltutmaq ve Ukrayına cemiyetini memleket içinde köçip kelgenlerniñ ve Ukrayına şarqı ve Qırımda silâlı zıddiyet neticesinde zarar körgen diger insanlarnıñ aq, serbestligi ve menfaatlarını qorup birleştirmek içün yapıla», – dep bildire «KrımSOS».
Rusiye Federatsiyasınıñ Baş prokuraturası er angi çetel ya da halqara ükümetten tış teşkilâtqa «istenilmegen» teşkilât statusını bere bile. Rusiyede «istenilmegen» teşkilâtlarğa faaliyet köstermege yasaqlana. Bunıñ em memuriy, em cinaiy cezası bar.
Al-azırda «istenilmegenler» cedvelinde tahminne 70 teşkilât bar, olarnıñ arasında «Proyekt», «Vajnıye istorii», OCCRP tedqiqatçı jurnalistlerniñ halqara birleşmesi, Genrih Bell Fondu, Saharov Fondu ve digerleri bar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
