Rusiye Baş prokuraturası tarafından «istenilmegen» olaraq tanılğan «KrımSOS» aq qorçalayıcı teşkilâtınen işbirligi yapqan qırımlı faaller «çetel agenti» statusını ala bile, bu aqta aq qorçalayıcı ve advokat Nikolay Polozov Qırım.Aqiqatqa tarif etti.
Advokat qayd etkenine köre, bular Kreml kontrolindeki Qırım akimiyeti tarafından «siyasiy maqsatqa uyğunlıq» olsa, ola bile.
«İstegilmegen teşkilâtnıñ faaliyetinde iştirak etüv sebebinden taqipniñ çetel agenti statusını berüvden ğayrı, diger normativ («uquqiy» sözüni qullanmayım) esasları bar. Amma siyasiy maqsatqa uyğunlıq olsa, Rusiye akimiyeti içün bir mania yoq», – dep qayd etti advokat.
Nikolay Polozovnıñ qayd etkenine köre, Rusiye Federatsiyası Memuriy uquq bozuvları kodeksiniñ 20.33 maddesine köre, Rusiyede «istenilmegen» teşkilâtnıñ faaliyetinde iştirak etüv sebebinden 5 biñden 15 biñ rublege qadar para cezası berile. Rusiye Federatsiyası Ceza kodeksiniñ 284.1 maddesine köre, bir yıl içinde aynı sebepten eki kere memuriy mesüliyetke çekilgen şahısnıñ böyle faaliyette iştirak etmesi üç yüz biñden beş yüz biñ rublege qadar ya da ekiden üç yılğa qadar alğan qazançlarnıñ miqdarında, ya da üç yüz altmış saatqa qadar mecburiy işler, ya da eki yılğa qadar azatlıqnıñ sıñırlanmasınen beş yıllıq mecburiy işler ya da eki yıldan altı yılğa qadar belli vazifelerde bulunuv yasağı ya da on yılğa qadar belli bir faaliyetnen oğraşuv yasağı berile bile.
2022 senesi dekabr ayında Rusiye adliye nazirligi Aqyarlı jurnalist Anastasiya Jvikni çetel agentleri cedveline kirsetti. O, bu status berilgen birinci Qırım sakini oldı. Jvik Rusiye akimiyeti «çetel agenti» olaraq tanığan ve «istenilmegen teşkilât» dep ilân etken «Meduza» neşirinen işbirligi yaptı.
İşğal altındaki Qırımda Rusiye kontrolindeki akimiyet devlet hadimlerini çetel agenti statusını alsalar, işten çıqarmağa niyetinde.
«KrımSOS» aq qorçalayıcı teşkilâtı Rusiyede «istenilmegen» dep tanıldı, dep bildirdi Rusiye Baş prokuraturası. Rusiyede «istenilmegen» teşkilâtlarğa faaliyet köstermege yasaqlana. Bunıñ em memuriy, em cinaiy cezası bar.
Ukrayına ombudsmeni Dmıtro Lubinetsniñ fikirince, Rusiye akimiyetiniñ qararı istilâcı memleketniñ repressiv siyaseti deñişmegenini isbatlay. «KrımSOSnı» yasaqlap, Rusiye Ukrayına Qırımında yapılğan kütleviy cinayetlerni gizlemege tırışa», – dep qoştı o.
«KrımSOS» yarımada işğaliniñ ilk künleri – 2014 senesi fevralniñ 27-nde göñülliler tarafından Facebookta «Qırımdaki vaziyetnen bağlı tez ve teşkerilgen malümat» bermek maqsadınen bir saife olaraq açıldı. Al-azırda maqsadı «Qırımnıñ işğalden qurtarıluvı ve yarımadanıñ reintegratsiyası» olğan cemaat ve aq qorçalayıcı teşkilâtı ola.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
