2019 senesi «Qırım inciri» ekinci edebiyat yarışı finalistleriniñ qısqa cedveline kirgenler arasında qırımlı siyasiy mabüsler bar.
Yarış teşkilâtçılarınıñ malümatına köre, bu Osman Arifmemetov – vatandaş jurnalisti, «Qırım birdemliginiñ» faali. 2019 senesi mart ayında evinde keçirilgen tintüvlerden soñ tutuldı. O, terror teşkilâtınıñ faaliyetini teşkil etüvde qabaatlanıp, 20 yılğa azatlıqtan marum etile bile. O, «Sürgünligim» adlı eserini ukrain tilinde yolladı.
Yarış finalisti olğan ekinci siyasiy mabüs – Server Mustafayevdir – «Qırım birdemligi» cemaat birleşmesiniñ koordinatorı, vatandaş jurnalisti. Mustafayev uydurılğan dava boyunca terror teşkilâtınıñ faaliyetinde iştirak etkeninde ve akimiyetni küçnen zapt etmege tırışqanında qabaatlana. O, 20 yılğa qadar apis cezasına üküm etile bile. Server «Alhamdulillâh, musulmanmız» şiirini qırımtatarca yolladı.
Qısqa cedvelge kirgen yarış iştirakçileriniñ tolu cedveli «Qırım eviniñ» Facebook saifesinde derc etildi.
Bu sene edebiyat yarışı Ukrainanıñ 20 regionından ve Türkiye, Bulğaristan, Poloniya ve Ürdünden eserlerni topladı. Umumen 304 eser keldi, bir qısmı Qırımdan yollanıldı, dep bildire teşkilâtçılar.
«Qırım inciri» birinci yazıcı yarışı 2018 senesi yazda başlağan edi. İşler oktâbrniñ 31-ne qadar qabul etildi. Yarışqa bütün Ukrainadan altı nominatsiyada 135 müellifniñ 244 işi keldi: «şiiriyet», «qırımtatar tilinde nesir», «ukrain tilinde nesir», «tercime» ve «qadın baqışı».
«Qırım inciri» ukrain-qırımtatar cıyıntığı Kyivdeki «Kitap arsenalında» taqdim etilgen edi.
