Rusiye prezidenti Vladimir Putinniñ saytında mayısnıñ 1-nde «Rusiye Federatsiyasınıñ vatandaşlığına qabul etilmek içün qolaylaştırılğan tertipte ariza bermege aqqı olğan bazı çetel vatandaşları ve vatandaşlıqsız şahıslar aqqında» buyruq metni derc etildi. Vesiqada aytılğanı kibi, qolaylaştırılğan tertip Qırım ve «Ukrainanıñ Donetsk ve Lugansk vilâyetleriniñ ayrı rayonlarınıñ» sakinleri içün keçerli ola.
Buyruqta qayd etilgeni kibi, Rusiye Federatsiyasına qabul etilüv arizası üç aydan çoq baqılmamalı, dep haber ete Azatlıq Radiosı.
«Bu buyruq imzalanğan künü işke tüşürile», – dep aytıla Kremlniñ saytında.
Rusiye qoltutqan aydutlar tarafından kontrol etilgen Ukraina şarqındaki rayonlarnıñ sakinlerine Rusiye vatandaşlığını qolay almağa imkân bergen buyruqnı Rusiye prezidenti Vladimir Putin aprelniñ 24-nde imzaladı. Bu qararnı Ukraina ve ğarbiy ittifaqdaşları sert bir şekilde tenqit etti.
Bu künleri Rusiyede Ukraina vatandaşlarına Rusiye pasportlarını bergen merkezler açılıp başladı.
Resmiy Kyiv bu qararnı «uquq ceetinden emiyetsiz» dep adlandırdı.
