Salı künü, dekabr 10-unda Kremlniñ sabıq siyasiy mabüsleri Rigağa (Latviya) reabilitatsiya keçmek içün kelip çıqtı.
Bunı, Ukrainanıñ Latviadaki elçiligi bildire.
Hususan, Latviada reabilitatsiyanı Volodımır Baluh, Aleksandr Kölçenko, Oleg Sentsov, Edem Bekirov, Pavel Grib, Nikolay Karpük, Stanislav Klıh, Artur Panov, Yevgeniy Panov, Aleksey Sizonoviç ve Roman Suşçenko keçecek.
Elçilikniñ malümatına köre, ukrainler, dekabrniñ 21-isinece "Vayvara" (Yurmala) merkezinde tedaviylenecek.
"Olarnen beraber qoranta azaları olacaq. Oleğ Sentsov taqımğa tahminen dekabrniñ 15-inde qoşulacaq", - denile beyanatta.
Ukrainlerni ava limanında Ukraina elçileri qarşılay edi.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
