Rusiye ve Ukrayina arasında topraq deñişimi mümkün degil, dep bildirdi Rusiye prezidentiniñ matbuat kâtibi Dmitriy Peskov.
Onıñ aytqanına köre, Rusiye öz toprağını deñişüv mevzusını iç bir vaqıt muzakere etmedi ve etmeycek de. "Elbette, ukrayin birleşmeleri bu topraqtan quvulacaq. Yoq etilmegen er kes sürgün etilecek", — dedi Peskov.
Keçende Ukrayina prezidenti Volodımır Zelenskıy, muzakereler keçirilse, Moskvağa Kursk vilâyetinde Ukrayina Silâlı quvetleri kontrol etken topraqlarnı Rusiye ordusınıñ kontroli altında olğan ukrayin topraqlarına deñiştirmege teklif etmek mümkün, dep bildirdi. Onıñ qayd etkenine köre, Kıyiv Kursk vilâyetiniñ yerine Rusiye tarafından işğal etilgen topraqlarnıñ ne qadar qısmını isteycegini daa bilmey.
Zelenskıy, Rusiye ile muzakerelerge azır olğanını, lâkin memleketiniñ küç noqtasından çıqmasını istegenini de ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
