Kremlde, Moskva Kıyiv ile aracılar vastasınen muzakerelerge azırmı degen sualge cevap berdiler.
"Prezident Putin defalarca aytqan edi ki, Rusiye Federatsiyası, ögümizge qoyğan maqsatlarğa irişmek maqsadınen, er angi qonuşuv, er angi dialog içün açıq. Prezident bu açıqlıqnı saqlap qala, o bu aqta defalarca ayttı", — dedi Rusiye lideriniñ spikeri Dmitriy Peskov iyül 1-de brifingde.
Ukrayina prezidenti Volodımır Zelenskıy iyünniñ 30-nda The Philadelphia Inquirer amerika neşri içün bergen intervyüsında Ukrayina Rusiye lideri Vladimir Putinnen barışıq muzakerelerini tek aracılar vastasınen keçire bile, dep bildirdi.
Aynı intervyüde Zelenskıy, Rusiye prezidenti Vladimir Putinniñ "qorquzmasına yol bermemek" içün ABD Ukrayinağa NATO-ğa davet etüvge qol tutmay, dep ayttı.
Mayısnıñ 28-nde Amerikanıñ Time jurnalına bergen intervyüsında prezident Joe Biden, Ukrayinadaki cenkniñ nasıl bitmesi aqqında soralğanda, "barış Rusiyeniñ Ukrayinanı iç bir vaqıt işğal etmemesiniñ kefaleti kibi körünecek", dep ayttı. Amma, Amerika lideriniñ fikrine köre, bu Ukrayinanıñ NATO-ğa qoşulması demek degil.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
