Rusiye prezidentiniñ matbuat kâtibi Dmitriy Peskov jurnalistlerge bildirdi ki, Donetsk, Lugansk, Zaporojjâ ve Herson vilâyetleri "Rusiyeniñ ayırılmaz qısmıdır", şunıñ içün "bu mesele boyunca muzakereler olmaycaq".
"Rusiye Federatsiyasınıñ subyektleri olğan ve memleketimizniñ Anayasasında yazılğan topraqlar Rusiye memleketimizniñ ayırılmaz qısmı ola. Bu şübesiz bir kerçek ve muzakere etilmegen bir kerçek", — dep qayd etti o.
Peskov, ABD prezidenti Donald Trampnıñ Ukrayinağa qarşı cenkniñ bitirilmesi aqqında añlaşma, Rusiye tarafından işğal etilgen topraqlarnıñ bir qısmını Kıyivniñ nezareti altına qaytarmaqnı közde tutacağı aqqında aytqanlarını izaatladı.
"Ukrayinağa mümkün olğanı qadar çoq şeyni qaytarmağa tırışacaqmız", — dep ayttı Trump fevralniñ 26-nda.
Daa evel Rusiye tış işler naziri Sergey Lavrov Moskvanıñ muzakerelerden evel Ukrayinada ateş toqtatılmasına azır olmağanını bildirdi. Lavrov, muzakerelerniñ başlanuv şartı olaraq Ukrayinanıñ NATO-ğa kirmemesi ve Rusiye tarafından ukrayin topraqlarınıñ ilhaqınıñ tanılması aqqında añlaşmalarnı adlandırdı.Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
