RF Halqara ceza mahkemesiniñ yurisdiktsiyasını tanımay ve onıñ qararlarını "qanunsız ve qabul olunmaz" saya. Bunı Kreml spikeri Dmitriy Peskov Gaaga mahkemesiniñ Putiniñ tevqifine order çıqarmaq qararını izaatlar eken bildirdi.
"Sualniñ qoyuluvını çirkin ve qabul etilmez sayamız. Bir sıra diger devlet kibi Rusiye de bu mahkemeniñ yurisdiktsiyasını tanımay ve buña köre, bu kibi er angi qararlar uquq ceetinden Rusiye içün quvetsizdir", - dedi Peskov.
Rusiye TİN spikeri Mariya Zaharova, Rusiye Halqara ceza mahkemesiniñ Roma statutınıñ iştirakçisi degil ve onıñ qararlarını yerine ketirmek mecburiyetinde olmağanını bildirdi.
Martnıñ 17-nde Halqara ceza mahkemesiniñ Başlanğıç mahkeme palatası Rusiyeniñ Ukrayinağa qarşı cenki köntekstinde eki insan içün tevqif orderini çıqardı. Bular Rusiye prezidenti Vladimir Putin ve Rusiye prezidenti yanında bala aqları vekâletlisi Mariya Lvova-Belova. Olar Ukrayinanıñ işğal etilgen topraqlarından ealiniñ (balalarnıñ) qanunsız sürgün etilmesi ve ealiniñ (balalarnıñ) qanunsız şekilde Rusiyege köçürilmesi kibi cenk cinayetlerini yapqanı ile şubeli sayılalar.
Ukrayina Baş prokurorı ofisi Halqara ceza mahkemesiniñ qararını alğışladı ve "Ukrayin ve bütün halqara uquq sisteması içün tarihiy" dep adlandırdı.
Evel Kremlde Gaagadaki Halqara ceza mahkemesini ve onıñ yurisdiktsiyasını tanımaycaqlarını bildirgen ediler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
