Kremlde, Davostaki Ukraina ile bağlı muzakereler neticesiz olacaq, çünki "Rusiye iştirak etmey" dep bildirdiler.
"Bu, sadece laf etmek içün laf... Biz iştirak etmesek, muzakerelerniñ neticesi olmaz", - dedi Rusiye prezidentiniñ spikeri Dmitriy Peskov.
Dünya liderleri bu afta Davostaki Dünya iqtisadiy forumınıñ toplaşuvına barmağa planlaştıralar, muzakerelerniñ esas mevzuları Ukrayina ve Ğazze şeritinde cenkniñ toqtatılması olacaq, dep beklenile.
Yanvarniñ 14-nde İsviçreniñ Davos şeerinde milliy telükesizlik mesleatçılarınıñ dörtünci körüşüvi olıp keçti.
Ukrayina prezidenti Volodımır Zelenskıynıñ teklif etken formulası Rusiye Ukrayinağa qarşı alıp barğan cenkni yekünlemektir. Plan, Rusiye ordusınıñ halqara seviyede tanılğan bütün Ukrayina territoriyasından çıqmasını közde tuta, bundan soñ arbiy cinayetçilerniñ cezalanuvı, Moskvanıñ Ukrayinağa ketirgen zararları içün tazminat şartları aqqında muzakereler ve ilâhre keçirilmeli.
Ukrayina akimiyeti "barışıq formulasını" amelge keçirmek içün ittifaqdaş memleketlerniñ vekillerinen, em ne de Ukraiynanı, ne de Rusiyeni desteklegen memleketlernen, hususan "global cenüp" devletlerinen muzakereler keçire.
Yılnıñ soñunda Amerika cenkni ögrenüv institutı (ISW) bildirdi ki, Rusiye Ukrayina ile barışıq muzakerelerinde meraqlanmay, ve er angi barışıq oña tek yañı istilâğa azırlanmaq içün vaqıt berecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
