Kreml Ukrayina prezidenti Volodımır Zelenskıynıñ Ukrayina, ABD ve Rusiye liderleri seviyesinde körüşüvge azır olğanı aqqında beyanatına cevap berdi.
«Böyle körüşüv eki eyyet arasında çeşit saalarda yapılğan tam añlaşmalarnıñ neticesi olmaq kerek. Bu ceetten bizim pozitsiyamızda bir deñişme yoq», – dedi jurnalistlerge Rusiye prezidentiniñ spikeri Dmitriy Peskov, Putin ve Zelenskıy özleri ya da ABD prezidentiniñ iştirakinen körüşe bilelermi sualine cevap berip.
O, barışıq memorandumı üzerinde iş «soñki» basamaqta buluna, dep bildirdi.
Ukrayina prezidenti Volodımır Zelenskıy Ukrayina, ABD ve Rusiye liderleri seviyesinde körüşüvge azır olğanını bildirdi.
«Putin eki taraflı körüşüv istemese ya da er kes üç taraflı körüşüv istese, men qarşı degilim. Men er angi formatqa azırım», – dedi o, jurnalistlerge.
Mayısnıñ 11-nde Putin ABD, Ukrayina ve onıñ Avropa ittifaqdaşlarınıñ Rusiye lideri qabul etmegen 30 künlük şartsız ateşkes teklifine cevap olaraq mayısnıñ 15-nde İstanbulda «evelden bir şart olmağan doğrudan-doğru» muzakereler keçirmege teklif etti, bunı Rusiye lideri qabul etmey.
Zelenskıy şahsen laf etmege azır olğanını bildirdi. ABD prezidenti Donald Trump da Ukrayina ve Rusiye muzakerelerine ilerilevine köre kele bile, dep bildirgen edi.
Kreml Putinniñ iştirakini başta tasdıqlamağan, mayısnıñ 14-nde aqşam ise eyyet erkânını ilân etti.
Neticede muzakereler eyyetler seviyesinde keçti. Taraflar büyük bir ilerilevge irişemedi, amma biñge biñ formatında esir deñişüvinde añlaştı. Mayısnıñ 25-nde deñişüv bitti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
