Rusiye prezidentiniñ matbuat kâtibi Dmitriy Peskov, Ukraina ve ABD prezidentleri Volodımır Zelenskıy ve Joseph Bidenniñ tünevinki körüşüvni tefsir etip, hususan Qırım muzakerelerinde olğan «Rusiyege qarşı laflarnı» qayd etti.
«Ukraina ve ABDniñ Qırım meselesinde ve «diger meselelerde» «Rusiyege qarşı lafları» yazıqsındıra. O qadar», – dep bildire Peskovnıñ aytqanlarını «İnterfaks» agentligi.
O, Ukraina ve ABD «Moskvağa qarşı çıqmaq içün dost munasebetlerini qurmağa niyetlengenlerine» yazıqsına, dep bildirdi.
«Amerika-Ukraina muzakerelerinde Rusiye mevzusı kün tertibinde olğanını kördik. Ne yazıq ki, esasen «menfiy» ceetten köterildi. Ve büyük ihtimalnen, anda Rusiyege qarşı Ukraina-Amerika dostluğı aqqında aytıla. Olar özleri içün degil, Rusiyege qarşı dostlaşalar», – dedi Peskov jurnalistlerge.
Sentâbrniñ 1-nde Beyaz Sarayda Zelenskıy ve Bidenniñ resmiy körüşüvi olıp keçti. Ukraina eyyeti Qırım ve Donbasta qanunsız esir etilgen 450 insandan ibaret cedvelni berdi.
Daa soñra Volodımır Zelenskıy Biden ile keçirilgen subet vaqtında Qırım mevzusı çoq aytıldı, dep bildirdi.
«Qırım sözü çoq aytıldı, «Qırım platformasınen» bağlı güzel sözlerden başlap. Amerika Birleşken Devletleri onı pek küçlü teşebbüs dep saya, oña qoltutmağa isteyler. Mesele qıyın, şunıñ içün Qırım çoq aytıldı. Mesele em Qırım işğaliniñ toqtatılması, em esirler ceetinden pek qıyın», – dep ayttı Zelenskıy brifing vaqtında.
Ukraina prezidentiniñ ofisi Volodımır Zelenskıy ve Joseph Bidenniñ muzakereleri vaqtında Ukraina ve Amerika Birleşken Devletleriniñ strategik ortaqlığı aqqında beyanatnı aydınlattı.
2014 senesi Rusiye Qırımnı işğal etti, bundan soñ Ukraina, ABD ve Avropa Birligi er yıl uzatılğan iqtisadiy sanktsiyalarnı kirsetti. 2021 senesi Ukraina akimiyeti yarımadanı işğalden qurtaruv halqara meydançığı olğan «Qırım platforması» quruluvınıñ teşebbüsçisi oldı.
