Kreml Rusiye prezidenti Vladimir Putinniñ Ukraina prezidenti saylavlarında lider olğan Volodımır Zelenskıynı tebriklemesi daa erte olğanını tüşüne, dep bildire Azatlıq Radiosı.
Bundan ğayrı, Putinniñ matbuat kâtibi Dmitriy Peskov Zelenskıy ile işbirligi imkânları aqqında aytmağa daa erte, dep bildirdi.
Rusiye Ukraina vatandaşlarınıñ saylavını ürmet ete, faqat «bu esnasnıñ qanunğa uymasınen» bağlı problemler aqqında bildire, dep qoştı Peskov.
«Bu saylavlarnıñ qanunğa uyması şübhe doğura, çünki Rusiyede yaşağan üç million Ukraina vatandaşına rey bermege imkân berilmedi», – dep bildire Peskovnıñ aytqanlarını TASS Rusiye haber agentligi.
Prezident saylavları protokollarınıñ 99,03%-ı teşkerilgen soñ Volodımır Zelenskıy saylayıcılarnıñ 13 412 695 reyini (73,22%) qazana, şimdiki prezident Petro Poroşenko ise – 4 480 854 (24,46%).
Ukrainada bozulğan saylav bülletenlerniñ sayısı 2,31%-nı teşkil ete. Ekinci tur rey berüvinde 18 317 647 saylayıcı iştirak etti. Saylayıcılarnıñ 62,07%-ı rey berdi.
