«Mında yañı bir şey körmeymiz. O, (Trump – QA) bu usullarnı begene, eñ azından, birinci prezidentligi vaqtında begene edi», – dep ayttı Peskov yanvarniñ 23-nde jurnalistlerge.
O, Kreml «bütün inceliklerni diqqatnen qayd ete», dep qoştı. «Biz dialogğa azır qalamız, prezident Putin bunı çoq aytqan edi – teñ aqlı dialogğa, özaraurmetli dialogğa», – dep qayd etti Kreml spikeri.
Yanvarniñ 22-nde ABD prezidenti Donald Trump Ukrayina ve Rusiye arasında tez vaqıtta barışıq añlaşmasını tizmege çağırdı ve Moskva añlaşmanı qabul etmese, Rusiyege qarşı yañı sanktsiyalar olacaq, dep qorquzdı.
Trump cenk sebebinden Rusiyeniñ iqtisadiyatı zarar köre dep, Putinge «büyük bir eyilik» teklif ete, dep ayttı.
Yanvarniñ 23-nde Reuters agentligi vaziyetnen tanış olğan beş menbadan kelgen malümatqa esaslanıp, Ukrayinada devam etken cenk vaqtında Rusiye prezidenti Vladimir Putinni Rusiye iqtisadiyatındaki muvazenesizlikler ziyade qasevetlendirgenini bildirdi.
Yanvarniñ 23-nde Amerika Cenkni tedqiq etüv institutınıñ esabatında makroiqtisadiy problemlerniñ bir sıra köstergiçi olğanına baqmadan, Kreml Rusiye iqtisadiyatı yahşı çalışqanını yalancı teessurat doğurmaq içün malümat areketini başlatqanı aqqında aytıla.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.