Rusiye prezidentiniñ matbuat kâtibi Dmitriy Peskovnıñ bildirgenine köre, Qırım işğaliniñ muzakere etilüvi «imkânsız ola» ve Ukraina ve Rusiye prezidentleriniñ körüşüvini «şübhege oğrata».
«Yoq, böyle alda [Qırımnıñ] muzakere etilüvi imkânsız ola. Qırımnıñ muzakere etilüvi imkânsız. Şunıñ içün böyle vaziyet bu körüşüvniñ keçirilüvini şübhege oğrata», – dep bildire Peskovnıñ aytqanlarını TASS devlet haber agentligi.
Onıñ aytqanına köre, Putinniñ Zelenskıynen laf etecek meseleler «Minsk añlaşmaları, Parij sammitiniñ añlaşmalarınıñ Kyiv tarafından yerine ketirilüvi ve eki taraflı munasebetlernen» bağlı.
Ukraina prezidentiniñ matbuat kâtibi Sergey Nikiforovnıñ «Dom» telekanalına bergen intervyüsında bildirgenine köre, Ukraina prezidentiniñ Ofisi, Qırım meselesi muzakere etilmeycek olsa, Volodımır Zelenskıynıñ Rusiye prezidenti Vladimir Putinnen körüşmesi mantıqsız ola, dep tüşüne.
Sentâbrniñ 5-nde Kreml Kyiv Moskva ile munasebetlerni eyileştirmek içün «siyasiy irade» köstermey, dep bildirdi. Rusiye prezidentiniñ matbuat kâtibi Dmitriy Peskov Vladimir Putin Volodımır Zelenskıynen körüşmege azır, dep bildirdi. Amma, qayd etkenine köre, böyle körüşüvniñ azırlanması Rusiye işğal etken Qırım meselesinen bağlı – çünki Ukraina prezidentiniñ Ofisi Zelenskıy Qırımnı muzakere etmege azır, dep aytalar.
Sentâbrniñ 7-nde Ukraina Tış işler naziri Dmıtro Kuleba Rusiye prezidentler Vladimir Putin ve Volodımır Zelenskıynıñ körüşüvine razı olmalı, dep bildirdi. Onıñ qayd etkenine köre, Kreml Qırım mevzusını muzakere etmege istemeyip, «endi bazarlıq ete».
Aprelniñ soñunda Peskov Putin Zelenskıynen Donbastaki vaziyetni de muzakere etmege istemey, dep bildirgen edi. Kremlniñ vekili aytqanına köre, Zelenskıy ve Putinniñ körüşüvi bu yıl olmaycaqtır. Saylavaldı kampaniyasından berli Putin ile şahsen körüşmege niyeti bar olğanını aytqan Zelenskıy muzakere etilecek meseleler arasında işğal etilgen Qırım ve Donbas topraqları ve bu yerlerde zapt etilgen ukrainalı mabüsler olmalı, dep qayd ete.
