Rusiye prezidenti Vladimir Putinniñ matbuat kâtibi Dmitriy Peskov Rusiyeniñ Qırım işğali yılında, martnıñ 18-nde, provokatsiyalar olsa, Rusiyeniñ cevabı tez kelir, dep bildirdi. Bu aqta o, martnıñ 15-nde «Ukraina tarafından ola bilecek provokatsiyalar aqqında» sualge cevap berip ayttı.
«Belli müessiselerimiz planlaştırılğan bütün provokatsiyalardan haberdar olğanından şübhemiz yoq. Bu müim künde er angi provokatsiyağa kerekli cevap berileceginden de şübhelenmeymiz», – dep bildire Peskovnıñ aytqanlarını «İnterfaks» agentligi.
Ukraina akimiyeti Peskovnıñ aytqanlarını şimdilik izaatlamadı.
Bundan evel Peskov Putin martnıñ 18-nde yarımada cemaatçılığınıñ vekillerinen telekopür yapacaq, dep bildirdi.
Videokonferentsiya rejiminde Qırım ve Aqyarnıñ içtimaiy-iqtisadiy inkişaf meseleleri boyunca toplaşuv keçirilmesi de planlaştırıla.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
