Rusiye prezidenti Vladimir Putin Ukraina prezidenti Volodımır Zelenskıynen bir de bir muzakereler keçirmege şimdilik planlaştırmay, dep bildirdi bazarertesi künü jurnalistlerge Putinniñ matbuat kâtibi Dmitriy Peskov.
«Şimdilik Zelenskıynen subet planları yoq. Amma kerek olsa, bu tez teşkil etilir», – dep bildire Peskovnıñ aytqanlarını TASS agentligi.
Cuma künü Prezident ofisiniñ yolbaşçısı Andriy Yermak Donbastaki vaziyet kerginleşkeni içün o, Normand formatınıñ iştirakçi devletleriniñ liderleriniñ siyasiy mesleatçılarınen acele mesleatlar keçire, dep bildirdi. Bunı Üç taraflı kontakt gruppasınıñ spikeri Oleksiy Arestoviç de tasdıqladı.
Martnıñ 26-nda Donetsk vilâyetiniñ Şumı qasabası civarlarında Ukraina quvetlerine qarşı açılğan ateş neticesinde dört ukrain askeri elâk oldı ve eki asker yaralandı.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.
BM malümatına köre, 2014 senesi aprel ayından başlap 2020 senesi iyülniñ 31-ne qadar silâlı zıddiyet neticesinde Donbasta 13100 - 13300 insan elâk oldı.
