Rusiye prezidenti Vladimir Putin dekabrniñ 23-nde Keriç köpründeki tren areketini açacaq. Kremlniñ matbuat hızmeti bildirgenine köre, Rusiye prezidenti «Cenübiy federal okrugına iş ziyaretini kerçekleştirecek».
«Ziyaret vaqtında devlet yolbaşçısı köpürci işçilernen laf etecek, saa reberleri prezidentke Rusiye cenübiniñ naqliyat infrastrukturasınıñ inkişaf planları aqqında malümat berecek», – dep aytıla Kremlniñ haberinde.
Qayd etile ki, şu künü Putin Adıgeya Cumhuriyetine iş ziyaretini kerçekleştirecek.
Daa evel Kreml vekili Dmitriy Peskov, Rusiye prezidenti Vladimir Putin Keriç köpürdeki tren areketiniñ açılışında iştirak ete bile, dep bildirdi.
Rusiye naqliyat nazirligi, Keriç köpründe 2019 senesi dekabrniñ 18-nden 25-ne qadar tehnologik işlerniñ keçirilüvi sebebinden naqliyat areketi sıñırlanacaq, dep tenbilegen edi.
Noyabrniñ 8-nde Keriç köpründen keçecek Qırım yolcu tren biletleriniñ satışı başlandı. «Grand Servis Ekspress» taşıma operatorınıñ malümatına köre, «Tavriyanıñ» ilk treni dekabrniñ 23-nde Sankt-Peterburgnıñ Moskva vokzalından çıqacaq.
Keriç boğazındaki köpürniñ maşina qısmı 2018 senesi mayıs ayında yengil maşinalar içün açılğan edi, daa soñra yük maşinalarınıñ areketi başlatıldı. Köpürniñ demiryol qısmı daa azır degil.
Ukrainanıñ beşinci prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
Avropa Birligi ve ABD Rusiye ve işğal altındaki Qırım arasındaki Keriç köprüniñ qısmen açılışını takbih etti. Ukraina tarafı 2014 senesi Qırım ilhaq etilgen soñ Rusiye ile köpür qurucılığı añlaşmasından çıqtı.
2014 senesi iyül ayında Ukraina ükümeti ilhaq etilgen Qırımdaki bütün limanlarnıñ işini resmiy şekilde toqtatqan edi.
