Rusiye prezidenti Vladimir Putinniñ er yıl toplağan «büyük matbuat konferentsiyasınıñ» keçirilüvi 2019 senesi dekabrniñ 19-na planlaştırıla. Kremlniñ matbuat hızmeti bildirgenine köre, Qırım saatinen saat 12:00-da (Kyivde saat 11:00-da) Putin kütleviy haber vastalarınen subetleşmege başlaycaq.
«Rusiye Prezidentiniñ matbuat hızmeti ve malümat idaresiniñ akkreditatsiya departameni tedbirde iştirak eteceklerniñ arizalarını qabul etmege başlay», – dep aytıla haberde.
Bıltır Putin «büyük matbuat konferentsiyasını» dekabrniñ 20-nde keçirdi. O vaqıt Qırımda telükesizlikni temin etecek arbiy tehnika sayısı arttırılacaq, dep bildirgen edi.
Bundan ğayrı, Rusiye prezidenti, Ukraina arbiy gemileri Rusiye sıñırcılarınen añlaşmayıp, Keriç boğazında «istegeni kibi areket etemez», dep bildirdi.
Putin, Qırım sakinleri 2014 senesinden soñ Ğarp memleketleri başlatqan sanktsiyalardan zarar köre, dep aytqan edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
