Kreml Rusiye prezidenti Vladimir Putin ve Frenkistan prezidenti Emmanuel Makron arasında «mündericeli» telefon subeti olğanını ilân etti.
Kremlniñ matbuat hızmeti yazğanına köre, subetdeşler Yaqın Şarqtaki vaziyetni İran-İsrail kerginligi ve Amerikanıñ İran özek obyektlerine ücümleri ceetinden muzakere etti.
Ayrıca qayd etile ki, Ukrayina etrafındaki vaziyet baqılğanda Putin «Ukrayina zıddiyeti – bu yıllar devamında Rusiyeniñ telükesizlik menfaatlarını körmemezlikke urğan, Ukrayinada Rusiyege qarşı platsdarm yapqan, rus tilli sakinlerniñ aqları bozulğanına köz yumğan, şimdi ise cenk areketleriniñ devam etmesini istegen ğarbiy devletlerniñ siyaset neticesidir», dep bildirdi.
Barışıq meselesinde Putin kene «Ukrayina buhranınıñ ilk sebeplerini yoq etüv» ve «yañı topraq kerçeklerinde» israr etti.
Frans-Press qayd etkenine köre, Makron Putinnen bağda qalmağa niyetlene. Subet vaqtında Frenkistan prezidenti ateşni toqtatmağa ve muzakerelerni başlatmağa çağırdı, dep haber ete Elysee.
Makron ve Putin 2022 senesinden berli ilk sefer telefonda laf ettiler.
ABD prezidentiniñ Ukrayina meseleleri mahsus vekili Keith Kellogg Rusiyeni ateşni acele toqtatmağa ve cenkni bitirmek içün üç taraflı muzakerelerge keçmege çağırdı. O, Rusiye «Ukrayinadaki vatandaş nişanlarını bombardıman etip, daa çoq vaqıtnı sozamaz», dep qoştı.
Kreml ise Moskvanıñ barışıq muzakerelerini sozğanını inkâr ete.
ISW Amerika Cenkni tedqiq etüv institutı bir qaç kere şunı qayd etken edi, Rusiye Ukrayinanıñ teslim olmasına teñ kelgen talaplarını ileriletecek, Rusiye bu maqsadını Putin Ukrayinada cenk yolunen ğalebe qazanacaqlarına inanğanı qadar devam ettirecek. Bunı deñiştirmek içün Ukrayinağa Ğarp, hususan ABD qoltutmalı, dep qayd ete talilciler.
ISW Rusiye uruş meydanında ilerilemege devam etmek ve uzlaşuvlarnı qazanmaq içün Ukrayinağa qarşı cenkni toqtatuv barışıq muzakerelerini sozmağa tırışa, dep bildirgen edi.
Kreml matbuat kâtibi Dmitriy Peskov iyünniñ 20-nde derc etilgen Sky News ingliz telekompaniyasına bergen intervyüsında Rusiye Ukrayina ile barışıq tizmeycek, ABD teklif etkeni kibi, çünki cenkte «strategik üstünligi» bar, dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.