Rusiye prezidenti Vladimir Putin ABDden Gazze Barışıq şurasına kirüv davetnamesini aldı, dep bildirdi spikeri Dmitriy Peskov.
Onıñ aytqanına köre, "bu teklifniñ bütün tafsilâtları baqıla" ve ABD ile bağ beklenile.
Washington bu davet aqqında daa bir şey bildirmedi.
Yanvarniñ 16-nda ABD prezidentiniñ memuriyeti Donald Trumpnıñ Filistin-İsrail zıddiyetini toqtatuv planına köre Gazze içün Barışıq şurasınıñ erkânını ilân etti. Yolbaşçısı Trumpnıñ özü olğan Barışıq şurasına ABD devlet kâtibi Marco Rubio, ABD prezidentiniñ mahsus vekili Steven Witkoff, Trumpnıñ kiyevi Jared Kushner, Büyük Britaniyanıñ sabıq baş naziri Anthony Blair ve başqaları.
Bloomberg agentligi nizamname leyhasına esaslanıp, Trumpnıñ memuriyeti Barışıq şurasında yer almağa istegen memleketlerden eñ az bir milliard dollar bermesini rica ete. Leyhağa köre, Trump Şuranıñ ilk reisi olacaq ve kimler aza olaraq davet etilecegine qarar berecek. Şurada qararlar reylerniñ eksertiyetinen qabul etilecek, amma reis olarnı tasdıqlamaq kerek.
Agentlik bildirgen vesiqağa aytılğanına köre, er bir aza-devlet nizamname işke tüşürilgeninden eñ çoq üç yıl devamında vazifesini yapacaq, reis onı yañıdan vazifelendire bile, lâkin azalıqnıñ üç yıllıq müddeti bir milliard dollardan çoq bergen aza-devletlerge tarqalmay. Resmiy şekilde böyle ücret aqqında haber etilmedi.
Yanvarniñ 14-nde ABD Barışıq şurası ve Milliy komitet quruluvını közde tutqan Gazzede cenkni bitirüv planınıñ ekinci basamağı başlandı, dep ilân etti. Tahmin etilgenine köre, Barışıq şurasına ait Milliy komitet Filistin milliy memuriyeti idareni özüni ala bilmek içün kerekli islâatlar keçirgenine qadar Gazzeni idare etecek.
