Kreml Miamide Rusiye ve ABD vekilleriniñ Rusiyeniñ Ukrayinağa qarşı cenkini toqtatuv yollarınen bağlı muzakereleri ilerilev olaraq sayılmay, dep bildirdi.
"Bu – bir iş esnası… Eñ esası amerikalılardan avropalılar ve ukrayinalılarnen iş neticeleri aqqında malümat almaq edi. Ve buña baqıp añlamaq, bu teklifler Ankoricke uyamı (avgust ayında Alâskadaki Ankoricte ABD ve Rusiye prezidentleriniñ sammiti oldı. Körüşüv neticesinde Donald Trump Rusiyenen Ukrayina meselesinde "añlaşma" olmadı, dep ayttı – QA)", – dedi Kreml spikeri Dmitriy Peskov Miamideki muzakerelerni ilerilev olaraq saymaq mümkünmi sualine cevap berip. Peskovnıñ aytqanlarını "İzvestiya" Rusiye haber neşiri bildire.
Soñki aftaları ABD Moskva ve Kyiv arasında barışıq añlaşmasınıñ tizilmesini istey. Aftalıq muzakereler neticesinde Kyivge daa çoq kelişken vesiqa azırlandı, amma bir qaç pıtraqlı mesele qala, hususan topraq ve telükesizlik kefaletleri.
Dekabrniñ 14-nde ve 15-nde Almaniyada Ukrayina prezidenti yolbaşçılığında Ukrayina eyyetiniñ ABD prezidentiniñ mahsus vekili Steve Witkoff ve ABD prezidentiniñ kiyevi Jared Kushnernen muzakereleri devam etti.
Mayamide (Florida, ABD) dekabrniñ 19-21-nde Ukrayina ve ABD eyyetleri Trumpnıñ barışıq planınen bağlı bir sıra körüşüvler keçirdi. Amerika tarafı RF vekillerinen de körüşti.
Aynı vaqıtta ne ABD ve Rusiye muzakerelerinde, ne de ABD ve Ukrayina körüşüvlerinde bir ilerilev alâmeti olmadı. Kelecekte olacaq körüşüvler aqqında aytılmadı.
Muzakerelerden soñ Rusiye arbiyleri Ukrayinağa qarşı daa bir kütleviy raketa-dron ücümini kerçekleştirdi.