ABD prezidentiniñ milliy telükesizlik mesleatçısı Jacob Sullivan Rusiye prezidenti Vladimir Putinniñ tış siyaset yardımcısı Yuriy Uşakov ve Rusiye telükesizlik şurasınıñ kâtibi Nikolay Patruşevnen gizli muzakereler keçirdi. Bu aqta The Wall Street Journal menbaları haber etti.
Gazetanıñ malümatına, Rusiye resmiy şahıslarınen keçirilgen muzakerelerniñ maqsadı zıddiyet kerginleşmesini eksiltmek ve bağ kanallarını açıq tutmaq edi. Ukrayınadaki cenk bitmesiniñ şartları muzakere etilmedi.
Keçken afta Sullivan Kyivge kelip, Ukrayına prezidenti Volodımır Zelenskıynen körüşti.
Bundan ğayrı, neşirniñ subetdeşi aytqanına köre, Washington Moskvanı nükleer silâ – ya da diger kütleviy yoq etüv silâsını qullanmasından saqındırdı.
ABD milliy telükesizlik şurasınıñ matbuat kâtibi Edrienn Uotson gazeta haberlerini tasdıqlamadı ve inkâr etmedi.
Gazeta menbaları The Washington Postnıñ ABD Ukrayına prezidenti Volodımır Zelenskıyden barışıq qıdırmağa azır olğanını açıq aytmağa rica etkenine dair malümatını tasdıqlay. ABD Ukrayınanı muzakerege itmey, dep ayttı Beyaz Saraydaki subetdeşler. Maqsat Ukrayınağa vatandaşları uzun yıllar cenk devam eteceginden qorqqan memleketlerniñ yardımını temin etmek ola, dep qayd ete gazeta. Hususan – Afrika ve Latin Amerika, cenk başlağanından berli energetik ve aşayt buhranına eñ çoq olar oğradı.
Ukrayına ve Rusiye muzakereleri mayısta toqtatıldı.
Oktâbrniñ başında Zelenskıy bir buyruq imzaladı. Oña köre, Rusiye prezidenti Vladimir Putin qalsa, Rusiyenen muzakere keçirmek imkânsız ola. Bu Moskva işğal etken Ukrayına regionlarını ilhaq etken soñ oldı.
Putin Rusiye muzakerege azır, amma işğal altındaki topraqlar meselesini laf etmeycek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
