Kreml Moldovadaki vaziyetni kerginleştirmek maqsadınen yapacaq gibrid operatsiyaları içün Pridnestrovye ve Gagauz Yerini qullanmağa istey, dep bildirdi Amerika cenkni tedqiq etüv institutı (ISW).
«Kreml bu eki regionnı vaziyet kerginleşüvi ve Moldovanıñ bölünmesi içün Avropa Birligine qoşuluv muzakereleri ve 2024 senesinden soñ Moldova prezident saylavları arfesinde qullanmağa ümüt ete», – dep aytıla haberde.
Talilciler Gagauz Yeriniñ Rusiye tarafdarı reberi Yevgeniya Gutsulnıñ Rusiye memurlarınen körüşkenine diqqat ayırdı. Martnıñ 6-nda o, Rusiye prezidenti Vladimir Putinnen Soçide körüşti. Putin Gagauz Yeri ve gagauz halqına qanuniy aqları, vekâlet ve halqara alandaki yerlerini qorçalavda qoltutmağa vade etken eken.
Moldova prezidenti Mayya Sandu Moskva Ukrayınada ğalebe qazansa, toqtamayıp qalğan Avropa içün telükeli olacaq, dep tenbiledi. O, bunı martnıñ 7-nde Frenkistan ile mudafaa ve işbirligi añlaşmasını imzalap ayttı.
Martnıñ 5-nde Moldova istihbarat ve telükesizlik hızmeti (SIS) Rusiye memleketni kerginleştirecek adımlarnı planlaştıra, dep tenbiledi. SIS yolbaşçısı Aleksandru Mustâta martnıñ 5-nde bildirgenine köre, müessisesi Moldovanıñ Avropa Birligine qoşulmasını telükege oğrata bilgen ve Rusiyeniñ tesirine qaytara bilgen areketler aqqında «belli malümatlar» aldı.
2022 senesi Kişinev Avropa Birligi azalığına dair muzakere açılışına davet aldı ve bu yıl blokqa qoşuluvnen bağlı umummilliy referendum keçirmeli.
Prezident ve parlament saylavları bu yıl soñuna planlaştırıla, Sandu ekinci kere namzet köstermege planlaştıra. PAS firqası yerli saylavlarda reylerniñ 40 fayızından ziyadesini aldı ve parlament saylavlarında lider oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
