Kreml, Qırım yalısında FSB tarafından zapt etilgen ukrain askerlerini cenk esiri dep saymay. Bunı dekabrniñ 28-nde Rusiye prezidentiniñ matbuat kâtibi Dmitriy Peskov bildirdi, dep haber ete UNIAN.
«Cenk esirleri mında yoq. Olarnıñ ifadelerini bilmeyim, çünki tahqiqat keçirile. Tahqiqat ketişatını er vaqıt taqip etmege imkânımız yoq. Amma cenk esirleri aqqında laf ketkenine razı olamayım. Rusiyede cenk esirleri yoq», – dedi Peskov.
Onıñ aytqanına köre, «laf Rusiye devlet sıñırlarını bozğan çetel vatandaşlarınen bağlı dava aqqında kete».
Kremlniñ resmiy saytında bu beyanat şimdilik derc etilmedi.
Almaniya kantsleri Angela Merkel ve Frenkistan prezidenti Emmanüel Makron, Rusiyeden FSB tarafından zapt etilgen ukrain deñiz askerleriniñ şartsız ve acele azat etmesini ve Keriç boğazından gemilerniñ maniasız keçmesini temin etmesini talap ettiler.
Tünevin rusiyeli advokat Nikolay Polozov, FSB tarafından esir alınğan 24 ukrain askeri tahqiqatqa cenk esiri olğanını qayd etti, dep bildirdi.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
