Rusiye prezidenti Vladimir Putin Brânsk vilâyetinde olıp keçken adiseler sebebinden martnıñ 2-nde Telükesizlik şurasını toplamaycaq. Toplaşuv martnıñ 3-ne belgilendi. Bu aqta Rusiye prezidentiniñ matbuat kâtibi Dmitriy Peskov bildirdi.
TASS Peskovnıñ aytqanlarına esaslanıp, Putin Kremlde buluna, FSB, Mudafaa nazirligi ve Rusiye gvardiyasından Brânsk vilâyetiniñ sıñırındaki rayonnıñ vaziyetine dair maruza ala. Anda «ukrayın diversantları» keçken eken.
Peskov Brânsk vilâyetinde olğanlarnı «terroristlerniñ ücümi» dep adlandırdı. Onıñ aytqanına köre, «terroristler yoq etile».
Putinniñ spikeri Rusiye prezidenti «mahsus operatsiyanıñ» statusını deñiştirecekmi, yani Ukrayınağa cenk ilân etecekmi bilmey, dep ayttı.
Martnıñ 2-nde Rusiye devlet kütleviy haber vastaları ve Kremlge qoltutqan Telegram kanalları Ukrayına ile sıñırı olğan Brânsk vilâyetiniñ eki köyünde «ukrayın diversantlarınen» «uruş çatışmaları» aqqında bildirdi. Ukrayına prezidentiniñ ofisi bunı «daa bir provokatsiya» dep adlandırdı. «Şimal» Ukrayına komandanlığı «duşman provokatsiya yapıp, Ukrayına Silâlı quvetlerini itibardan tüşürmege tırışa bile», dep hatırlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
