Rusiye prezidenti Vladimir Putinniñ matbuat kâtibi Dmitriy Peskovnıñ fikirince, Rusiyeniñ «telükesizligi içün er şey yapmağa aqqı bar». Bu şekilde o, dekabrniñ 7-nde qabul etilgen BM Baş Assambleyasınıñ Qırım yarımadasınıñ askeriyleştirilüvine dair yañı qararını izaatladı.
«Laf Rusiyeniñ suveren toprağı aqqında kete, halqara uquq ve halqara mecburiyetler çerçivesinde Rusiyeniñ anda öz telükesizligini temin etmek içün er şey yapa bile», – dep bildire Peskovnıñ aytqanlarını «İnterfaks» agentligi.
17 memleket, şu cümleden Rusiye, qararğa qarşı rey berdi. 63 memleket vesiqanıñ qabul etilüvine «ebet» dedi, daa 62 memleket bitaraf qaldı.
Ukraina Tış işler naziri Dmıtro Kuleba BM Qırımnıñ askeriyleştirilüvine dair yañı qararını Rusiyege qarşı uquqiy basqınıñ daa bir parçası dep adlandırdı.
Rusiyeniñ BM temsilciligi qayd etkenine köre, bu qarar yarımada sakinleriniñ yaşayışına bir şekilde tesir etmeycek. Temsilcilik vesiqanı «yalan ve saçma» dep adlandırdı.
